美國銀行宣佈客戶拖欠卡數比率上月跌至6.73%，錄得08年11月以來最低水平，主要原因係市民仲收到政府嘅退稅。呢啲欠卡數超過30日嘅人，要靠政府退稅至可以畀到MinPay，可見信用卡壞賬危機仍在。
反映經濟情況嘅波羅的海指數（BDI），一年內升幅超過六成，理論上經濟應該強勁復蘇，但點解完全Feel唔到？
波的指數上升，部份係受運費上調拉動，中國遠洋（1919）今年首季亞太航線已加價，中海集運（2866）都預期今年平均運費要升兩成。不過，咪以為係由經濟帶動，航運股重掌議價能力，加價主要係同金融海嘯後縮減咗船隊有關。

運力增不利議價

有250年歷史嘅波的指數，自1985年開始有系統地買賣，但字號老唔一定好，因為一直以來交易對手少，透明度極低。回顧08年，指數炒到歷史新高11793，然後急挫90%至633，放諸股市，早已達股災級數，當時跟指數炒航運股，隨時輸到傾家蕩產。隨着市場擔心經濟放緩，波的指數亦見頂回落，單係成份內嘅海岬型運費指數（BCI）應聲下跌，海岬型船單日租金跌至1134美元。
歐洲債務危機後，投資格局有變，航運股料繼續受壓，唔係撈底首選。首先，航運公司已陸續增加運力，對運費壓力唔輕。此外，未來兩年共有18艘新船將會付運，除非中國同澳洲嘅鐵礦石談判有非常戲劇性進展，否則都幾難有起色。值得留意係歐元已被炒家砌低，人民幣兌歐元及英鎊明顯升值，將大大打擊中國輸往當地嘅出口。
月底中美經濟戰略對話前，美國目標已達，財長蓋特納大可掩住半邊嘴笑，多謝人民幣被動升值。觀乎美國係最大受惠者，一來美元（相對歐元）強勢，商品價格變相平咗；二來全球又要畀面，中東唔敢再話用歐元計油價；三來逼人民幣升值有助美國出口。歐元被狙擊，美國賺到盡。
胡孟青