由利物浦外借到土超比錫達斯嘅德國門將卡利奧斯，周一喺社交網站貼文話，由於冇辦法同比錫達斯就欠薪問題達成共識，決定終止合約，意味呢位兩年前喺歐聯決賽連犯兩次致命錯誤累紅軍失冠嘅「膠龍」，將會重返利市。

卡利奧斯上年曾經俾比錫達斯拖糧四個月，一度要向國際足協尋求協助，不過呢位德國門將今年又再被拖欠薪金。卡利奧斯喺貼文表示，雖然自己過去幾個月一直好有耐性咁同球會管理層對話，更提出過自願減薪，希望盡力解決問題，但始終唔能夠達成共識，佢表示以咁樣嘅方式結束比錫達斯嘅生涯感到好遺憾。不過卡利奧斯亦表示非常感激比錫達斯畀機會佢上陣，仲話永遠會記得第一日嚟到土耳其嗰陣，球迷點樣熱情歡迎佢。

返紅軍同阿祖安爭位？

由於卡利奧斯𠵱家同利物浦仲有兩年合約，意味佢短期內好可能會重返英格蘭。卡利奧斯喺兩年前對皇家馬德里嘅歐聯決賽因為出現低級失誤，令紅軍斷送錦標，有唔少利物浦球迷知道佢離開比錫達斯後，表示唔太希望呢位「戰犯」歸隊，但亦有人歡迎佢返嚟，想畀多次機會佢。不過紅軍嘅正選門將艾利臣比加近幾季表現穩定，卡利奧斯想再次幫利物浦把關，真係唔知要等到幾時，或者佢要先諗嘅，係點樣踢走喺今季亦經常「派膠」嘅二號門將阿祖安卡斯迪路。