人間有情！一位利物浦球迷因為挺身而出，義助咗一對李斯特城小球迷嘅善行，近日成為咗網路紅人。事緣一名來自李城嘅青年球迷，在元旦翌日帶住年僅10歲嘅外甥去利物浦睇波，完場後因為誤信一名的士司機，去錯火車站兼用晒身上嘅錢，為了唔畀同行嘅外甥喺夜晚流落街頭，佢膽粗粗喺社交網站Reddit求救，希望有當地網民指點迷津，話佢知邊度有可以留宿一晚嘅室內公共設施，等佢可以坐到天光再向屋企人求助。估唔到一名紅軍球迷喺睇到呢個訊息後，先約呢對小球迷喺特定地方見面，然後更加畀錢兩位小球迷住酒店，仲幫佢哋畀埋去酒店嘅的士錢。

呢位青年球迷第二日上網多謝善心人，即刻令佢成為網路紅人，來自多倫多、悉尼、紐約甚至中國嘅網民都話願意請善心人飲嘢食嘢，令佢好搞笑咁話「有排都唔驚肚餓」。點知件事仲未完喎，果位10歲外甥嘅媽咪揸車嚟接走一對小球迷嘅時候，向利市一個支援流浪者嘅慈善組織，捐咗相當於兩晚酒店房間嘅金額，至於果位年青球迷嘅父母，亦都有向希斯布祿（Hillsborough）球場慘劇嘅籌款運動捐錢，真係人間有愛喇！