當年今日

南非IT之旅:電訊商撐非洲隊 打2010世盃

蘋果日報 2006/07/25 00:00


噚日介紹過南非開普敦最著名嘅好望角(CapePoint)以及桌山(TableMountain)之後,今日話題終於輪到全人類最注視嘅2010年世界盃!眾所周知,下一屆南非將首次成為主辦國,或者時間尚早的關係,小記喺上星期仲未發掘到任何世盃紀念品;但係,當地人對足球運動嘅熱愛程度,已經熱到爆燈嗰隻,甚至乎有可能晉身為鑽石、鮑魚之後,第三項最有「錢」途嘅行業㖭!
記者、攝影:陳國輝
非洲波Hit過皇馬
講到足球,究竟南非國內聯賽喺當地有幾受歡迎,絕對可以從波衫銷售上反映出來!小記走到開普敦投資以數億計嘅水門區(WaterFront),裏面有好多ShoppingHall,除例牌大賣南非特色精品且勁多食肆之餘,更唔少得搜括當地嘅足球產品。究竟南非人最愛巴塞、皇馬抑或曼聯?通通都錯!就小記所見,起碼有7成波衫都係來自本地球隊奧蘭多海盜(OrlandoPirate)。隊中雖然冇乜著名球星,且上屆聯賽成績亦只係排第二(已經唔錯喇!),但勝在獲全南非最大電訊網絡商Vodacom撐腰。上星期仲邀請曼聯南下友賽一場。即使主場敗北,但睇見型爆海盜Logo之後,甚至連唔買波衫嘅小記都執番件,唔着都擺吓嘛!
empty
■呢件OrlandoPirate球迷版波衫只賣港幣$233,買嚟儲吓都抵啦!
唔多人周街打機
講到手提或家用遊戲,小記暫未見到拎住PSP或NDS邊行邊玩嘅南非Gamer,甚至街邊機舖都唔多見;但無意中居然俾小記喺機場發現本港返貨冇耐嘅黑色版NDSLite,更驚訝係售價才不過R1,399(折約港幣$1,260),比起香港炒緊嘅$1,400蚊抵,主要原因應該係黑色NDSLite為歐美首賣,東南亞地區較遲推出,所以水貨炒得起。
empty
■喺約翰內斯堡機場搵到呢部黑色版NDSLite,可惜冇乜人理。