子華神(黃子華)喺《男親女愛》入面，就養咗隻寵物「小強」，即係曱甴呀，相信除咗子華神外，好多朋友都會對「小強」敬而遠之， 就好似男子組合C AllStar嘅成員On仔(陳健安)咁，佢今朝凌晨就喺facebook，上載咗24個曱甴藥餌，冇錯係24個，咁究竟係On仔間屋好大吖，定係佢真係驚成咁，要買咁多隻曱甴藥餌呢！？

不如睇下On仔點講先，佢上載咗24個藥餌後，佢留言話：「頭先見到有兩隻大曱甴出沒，好驚好驚好驚好驚，所以即刻去樓下些粉(便利店)買，原來冇，好在店員話我知幾百米外有間24超市，即買咗24個曱甴屋四周圍貼，老老實實究竟有冇用架？但係我又諗唔到咩方法可以令我安心啲，唯有係咁，真係好驚好驚好驚。」

講到好驚，可能大家話咁大個人，面對曱甴咁微細嘅生物，竟然驚成咁，On仔都有解釋嘅：「作為一個男子漢，好似唔應該，但我真係好驚曱甴，對唔住，請問大家有啲咩自(天)然啲嘅方法驅曱甴，唔好copy網上嘅資料，你真係試過又work先好講，感謝，好驚好驚好驚驚。」

on仔一出聲，想要一啲天然啲嘅驅曱甴方法，真係一呼百應，好多網民都馬上留言，如果閣下同on仔一樣想要天然驅曱甴方法，不妨參考下網民嘅方法：

「朋友試過用番梘水去噴，話真係work。」
「用寒冰噴霧，-75度一噴即凍瓜佢，無色無味，成隻硬曬結冰」
「研究證明，月桂葉子是天然的驅蟑螂物品。它們無法殺死蟑螂，卻可以將這種害蟲趕走。」
「我都超級驚曱甴！近期我試過將沖完咖啡的咖啡渣放在廚房及洗手間各角，有一段時間冇再見到呢種可怕嘅生物出現！」
「梳打粉加糖1:1（一定不能加水），放喺膠樽蓋度就ok。好work！100%天然！但要小心惹蟻」