當年今日
關於我們

馮仁昭四圍超:康華澳門做騷搵猛男護花

蘋果日報 2002/01/01 00:00


康華前晚同一男一女朋友,去咗跑馬地滿屋點心食消夜,由於近排天氣亁燥,所以佢哋話要食糖水滋潤吓。康華同馮仁昭講,佢噚日去澳門做一個私人派對嘅嘉賓,酬勞有五位數字。

曾被騷擾
趙薇日前喺湖南出席一個電視台活動時,慘被人潑屎,康華去澳門做騷,問佢會唔會擔心人身安全,康華話:「我唔知趙薇單新聞,我呢幾日冇睇報紙,我去澳門做騷,安全問題應該唔緊要,因為有猛男陪我去。」猛男?到底係邊個?康華話:「佢咪我阿哥囉!之前我試過去嗰邊做騷,返到酒店,有人上嚟拍門叫我落的士高玩,佢哋話有班人等緊我,最後我都冇去。」

白韻琴贏陳太奪「奇情女士」獎
零一年埋單嘞,香港電台第一台有個叫做《奇情一週》嘅節目,就搞咗個「奇情新聞大賞」。當中有個大賞叫「奇情女士」,馮仁昭知道白姐姐憑住上年入獄事件,以大比數拋離對手,喺8126張票數中,佢就佔咗43%,攞第一位,葉劉淑儀同陳方安生都敗喺佢手上,攞第二同第三。不過白姐姐話,呢啲獎,真係唔恨要!

盧希萊搞生意搵奶粉錢
前《睇真D》主持盧希萊生咗個女之後,成個人都開心咗好多,馮仁昭同佢通過電話,佢話老公豹哥做咗老竇之後,成熟穩重咗,雖然唔識湊女,但成日都喺個女隔籬睇吓有乜幫到手。兩公婆重諗住短期內搞吓生意,因為呢個時勢搵工做都唔容易,就算搵到,收入都好難理想。
臨記Fans百二蚊造勢
樂壇頒獎禮又係時候舉行,各大小歌手都空群而出,有啲唱片公司為咗同旗下歌手造勢,特登call齊fans吶喊助威,馮仁昭知道有啲臨時fans,每位收一百二十蚊,所以唱片公司搵三兩百個fans助陣,一次都要使成幾萬銀,都咪話唔揦脷。

彭羚缺席新城慶功宴
新力唱片嘅歌手前晚未能喺新城頒獎禮奪大獎,得歌曲獎嘅彭羚未有出席慶功,而台灣組合F4嘅獎項更留低咗喺慶功宴上,新力總經理王凱文噚日話並冇質疑賽果,彭羚只係習慣性唔出席慶功,而F4嘅獎項只係忙亂間遺留,佢哋事後亦緊張咁四處搵。

葉德嫻開Concert乘勢出碟
葉德嫻今年會重出江湖,佢喺三月開完演唱會之後,環球會乘勢同佢出碟。其實葉德嫻已經有好多年冇出過唱片,但佢喺年多前同許志安合唱嘅《教我如何不愛他》,反應都唔錯,所以葉德嫻對呢次出碟都好有期望,重專登搵埋倫永亮做監製㖭。