白鴿黨候選人何偉途呢鋪真係害己害人害街坊,既然已經報咗名參選,重斗膽返祖國風流,俾公安當場捉到,重要向老婆講一套,重要搞到肥仔明亂發炮,真係罪不可恕,有人開始懷疑佢係咪無間道,想害死白鴿黨。
不過,睇埋公安前日嘅記者會,你又不禁同情佢嘅遭遇。就算真係叫雞,佢老哥已經坦白交代,又接受勞教,你東莞公安可以繼續按你嘅規定,扣足佢六個月,點可以又忽然高調開記者會,將啲「吾不欲觀之」嘅相片公之於世,手法簡直卑鄙不要得,東莞公安為證明自己正確,實行置何偉途嘅個人尊嚴及家人感受不顧,係完全不文明嘅做法,若果話係冇政治目的,真係搵鬼信喇。
人權監察嘅羅沃啟講得好,東莞公安嘅做法直情係侵犯私隱,好離譜。當然你去問單親協會,佢哋梗係不齒身為區議員去嫖妓,認為唔尊重女性,而且辜負市民期望。但係何偉途犯事係一回事,大陸公安今次實在太過份啦。所以大眾睇到驚心之餘,唔想香港他日出現同樣情況,就要珍惜你手上一票。