大摩唱淡完滙控（005）之後，其他投行報告接踵而至，加入唱淡行列。最新係高盛睇滙控只值49元，較大摩預測的52元雖只是略低3元，不過連50元都無，令「大笨象」再跌2.7%，收報64.20元；滙控咁嘅表現，大市即使可以止跌，但回升都會乏力。
中行（3988）配售潮完結後，否極泰來，昨再升4.6%，收報2.04元。要留意，工行（1398）禁售期4月份才結束，令人擔心工行後市表現。

調整未完　候低買入

中國財險（2328）和中行一樣，在行業板塊中都係被人睇低一線，你問人保險股邊隻好，十個中有八個都話先睇國壽（2628）及平保（2318），再揀先諗財險。星俠卻認為，財險其實唔差，以去年10月低位至今升幅比較，財險明顯威過平保及國壽，該股去年10月低位1.75元，現價3.59元，累升105%，國壽期間升幅45%，平保則累升55%。
內地推汽車業拯救方案，如汽車銷售回升，財險亦會受惠。另外，母公司人保集團今年將推進完成股份制改造，不排除今年上市，亦會令財險添上憧憬。月初財險衝上4.84元後遇阻力，料調整未完，可待回落至3元水平買入，下一浪目標5.20元。
方星俠