當年今日

中環在線:《泰晤士報》狠批和黃 - 李華華

蘋果日報 2006/09/04 00:00


和黃大班霍建寧曾經講過唔鍾意人「做佢世界」,最好就各有各搵食,河水不犯井水。不過,近排英國《星期日泰晤士報》就成日「啫」住佢嚟話。
上個星期日,講佢哋英國個3G網絡(即3英國)客戶流失嚴重,好少人真喺用佢哋嘅3G數據服務,𠵱家又要面對英國主要競爭對手Vodafone減價促銷嘅威脅,真係大吉利是。
客戶質素成疑
話口未完,啱啱嗰期《星期日泰晤士報》又再「做佢世界」,整多四両畀佢歎。今次講乜?係話佢哋嘅銷售代理促銷方式唔係好啱。話說有位68歲精神有問題嘅老人家,就係經佢哋促銷,喺短短數月內,同佢哋簽咗成十份合約,仲攞咗部名貴嘅3G手機。大部份仲係透過電話傳銷方式進行,聯絡資料則是透過數據公司攞到嘅。
報道又話,雖然所有合約都以同一地址登記,但3英國卻顯然未有察覺問題嘅存在,直至老人家個阿哥發現,向3英國要求取回數百英鎊款項。初時3英國拒絕處理有關問題,但上個星期,佢哋就表示事件十分罕見。
不過,《泰晤士報》話,事件令人關注到佢哋客戶嘅質素,同埋對3英國嘅業務增長帶來嘅影響。特別係受害嘅老人家,大部份合約都係喺5、6月間簽署,正是3英國表示要專注提升業務質量嘅時期。
睇嚟除咗去意大利羅馬巡視業務同散心,李超人同佢頭號助手霍建寧,都要放多啲時間去英國嗰邊!
李華華
[email protected]
empty