其實習副無風起浪,講錯嘢辣着火頭都唔係第一次,舊年7月訪港時忽然發表「三權合作論」,指行政、立法、司法要互相理解、支持,令法律界嘩然,因為香港素來奉行三權分立互相制衡,有新中國特色、服從黨領導嘅司法制度,對香港人真係天方夜譚,事後北京「護法」、特區官員都要出嚟解畫降溫,難怪港府官員家聽到習副講話就怕。
對於習副最新指示,各界解讀言人人殊,親中圈子一名老牌愛國人士同八方分析,習副呼籲港區人大為特區出謀獻策,似乎唔係針對人大,而係衝着煲呔而來。據呢位老愛國稱,金融海嘯後特區政府推出多項救市措施,更煞有介事成立經機會,然而對人大政協卻好似視而不見,因此佢認為習副其實係要提醒煲呔,日後分餅仔時唔好側埋一邊。
老愛國上述分析是否言之成理,毋須八方判斷,歷史遲早會有答案,不過巧合地煲呔噚日委任港區人大雷添良為特區出謀獻計,下月起接替鄭海泉做首長級薪常會主席,任期兩年。老愛國講開又講,指出近年每屆兩會前,都有人議論港澳辦主任廖暉會否退休,由於佢係煲呔「靠山」,因此其去留直接影響煲呔官運,習副點名叫大家挺曾,是否意味廖主任已經壓唔住場呢?一定要領導人開金口,先可以遏止下邊班人打小報告呢?京城政事複雜,呢位老愛國坦言暫時睇唔透。
mailto:
[email protected]