國際知名日本音樂人坂本龍一,一年前宣佈患上咽喉癌,並喺美國接受治療,今年5月佢已經成功抗癌返咗日本逗留一段短時間,仲曾經到訪北海道札幌市同當地官員見面。坂本喺抗癌期間仲關心香港嘅雨傘運動㖭。而今日坂本龍一仲宣佈會復工,第一件工作就係為著名導演山田洋次嘅新片《與母親生活》配樂。
坂本龍一復歸作絕對係兩大界別大師合作嘅作品,坂本係國際知名音樂人,山田係殿堂級導演,但原來今次佢哋只係第一次合作,《與母親生活》亦係由日本殿堂級女演員吉永小百合同人氣組合成員二宮和也合演,仲有柏林影后黑木華,套片可以話係猛人盡出。山田導演話,佢開拍套片時已經覺得一定要由吉永做女主角,坂本做配樂,別無他選喎。