【李八方online】嫌完鬆又嫌緊 林鄭再次離棄銅芯口罩
蘋果日報 2020/09/01 20:32
武漢肺炎林鄭月娥姚繼卓銅芯口罩
特首林鄭月娥早喺今年6月出席行會前記者會時，已試過公然狂踩政府「底褲」銅芯口罩，話呢個口罩「麻麻哋，可能洗得多鬆咗」，其後更試過索性唔戴口罩，今日（1日）現身行會前記者會時，佢又搵咗另一個原因即場離棄呢個「底褲」口罩。
話說林鄭今朝身先士卒，帶同官員接受武漢肺炎檢測後，即企喺一支印有巨型（至少10個人身位咁長）棉花棒嘅背幕前發言，其間見佢不時都用手搞口罩條繩。
林鄭於記者會上，不時用手調整口罩繩子。本報記者攝
林鄭其後被記者問到係咪因為政府唔受歡迎，搞到咁少人登記做全民檢測時，終於忍唔住除罩，再嘗試戴返，林鄭更一度稱：「希望啲攝影（記者）唔好係咁影我好唔好呀？」，顯得有點尷尬。之後就投訴個口罩可能「緊得滯」，一度向主持記者會嘅特首辦助理處長（傳媒）姚繼卓求救問：「有無一個（口罩）畀我換？唔知點解（個口罩）突然間唔得，哈哈」。
林鄭忽然除下口罩，並指口罩太緊。本報記者攝
早前試過喺記者會上突然暈倒嘅女副官陳嘉怡見狀，一度攞住個裝住紙口罩嘅透明膠袋上前，諗住畀林鄭，點知林鄭話自己其實唔使戴口罩，原因佢同記者嘅距離都有超過1.5米，令陳嘉怡只好返轉頭收埋口罩。
女副官陳嘉怡見狀，一度想把紙口罩遞上前給林鄭，惟林鄭指自己與記者距離超過1.5米，故不必戴口罩。本報記者攝
其實如果林鄭覺得同記者夠距離，就唔使戴口罩，咁點解佢一開始又要戴？究竟呢個「底褲」口罩係「太鬆」定「太緊」？相信只有林鄭自己先知。
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！