民主黨主席劉慧卿冇報名黨內立法會選舉甄選機制,換言之放棄下屆競逐連任。卿姐一直好口密,花生友聽聞,事前都冇乜黨友知道卿姐點諗;而佢開記招公佈棄選消息嘅前一晚,特別約咗新東成班新當選區議員去鯉魚門食海鮮,趁班兄弟姊妹醉醉哋時,交代退下火線嘅決定,唔知有冇乜玄機?
花生友聽聞,當晚食飯一直閒話家常吹水,直至大家食到七七八八、酒酣耳熱之際,卿姐忽然講咗句唔選,大家聽到先係呆一呆,之後就有人打圓場,話卿姐咁多年來辛苦喇!有心水清嘅人發現,已經報名爭取代表民主黨循新東出戰嘅林卓廷,當時已經飲到腳步浮浮,唔通卿姐係特別睇準呢個時機?