「逾七成港女私處痕、腫、有異味！」唔係呀化？費清都係引述港大民意研究計劃嘅調查咋，絲打唔好抦我呀。
有公司託港大民意研究計劃，上月電話訪問五百零七位，十八至五十九歲本港女性，結果逾七成女士受陰部感染不適困擾，包括「痕癢、紅腫」（44%）、「出現較多分泌物」（42%）、「有異味」（29%）、「外陰發炎」（24%）。
調查引起同事討論，冰肌玉骨嘅許同事當然冇受困擾，但都質疑調查搞錯對象，「唔係應該問佢哋男伴咩？好似口臭，有時自己都未必知喎」。

#清水番梘唔用得？

調查發佈會仲有婦科醫生話，女性外陰及陰道一般呈酸性保護，令病原微生物菌無法生長，但若長期使用偏鹼性的清潔用品如肥皂清洗陰部，有機會破壞酸性環境。佢又話，根據外國醫學界建議，只用清水清潔下陰不適，可能引致皮膚乾燥，甚至痕癢。
聽到都戥女仔慘。清水唔用得，番梘又話唔好，點做香香公主呀？家庭醫生關嘉美劈頭一句就同費清講，「個醫生係咪女醫生呀？我就係，我淨係知沖涼時用清水、沐浴露咪得囉！」
關醫生話，只要保持日常清潔，着棉質鬆身內褲，有需要一日換多條；如果有性生活，定期做柏氏抹片檢查、陰部細菌培殖檢驗等等，「有異味、分泌物可能係感染，咪醫囉，使咩怕醜」。

費清　 ＃要生計，也要生活 ＃毋忘初衷