甄子丹、汪詩詩、汪圓圓、湛琪清同男友Kenneth King今日到沙田馬場觀看打吡大賽，子丹連續六年擔任打吡大使，平日同太太詩詩都有投注買馬，問到子丹是否眼光獨到？佢指住太太然後賣口乖話：「好明顯係ok。」嚟緊復活節，子丹要忙開工，陪伴仔女重任交由太太負責各式各樣活動。

近日甄子丹夫婦兩人不時二人世界撐枱腳，詩詩指老公每次返港得一、兩日，所以要盡太太本份下廚，子丹話：「太太成日諗唔同餸菜款色，又會問我想食乜，然後去研究整，佢專心去做係幾有水準。」

身邊有不少朋友提議詩詩開餐廳，詩詩指自己廚藝係從父母身上學，而阿仔都遺傳咗入廚喜好，詩詩話：「我哋阿仔好細個時已經話想喺學校學煮飯，初時以為多女仔學而佢想學，原來佢係鍾意研究，又會煮利大利餐畀我試，平時會幫我切嘢。」子丹指囡囡愛吃，更是唔正唔食。

湛琪清透露買馬心水係睇馬名，尤其偏愛同食物有關名字，問到將來生小朋友是否以食物改名？佢甜笑話：「唔知呢。」最近婆婆來港，佢陪婆婆之餘，又帶男友給婆婆過目，佢指婆婆好鍾意男友，大獲正面評價。日前在大陸拍戲時不慎扭傷腳趾，返港後男友帶佢見自己從醫嘅爸爸檢查，湛琪清話：「畀隻腳佢爸爸檢查，我好尷尬，好彩唔係第一次見，下次要檢查腳都係唔好搵認識嘅人。」

精選娛聞，喺晒《娛果》
http://fb.com/appledailyent