港股低位反彈兩日，但美股輕微受壓已令港股黑期低水三嚿，指數反彈動力麻麻哋，好就好在，美股新上市中概股蔚來汽車、趣頭條喪炒，半新股拼多多亦癲過一大棍。

炒風越誇張，證明市場對於新經濟概念中概股餓波太耐。即使港股上市新經濟概念股大部分乏善足陳，但少數滄海遺珠如上次講阿里健康（241）、甚至將會上市嘅概念股，待市況回穩一段時間，遲早興奮起嚟。

美國上市咗有一兩年以上嘅中概股，之前係潛水得好勁，情況類似香港上市嘅美圖（1357）、閱文（772），面前蟹貨重重，要炒上都唔易。即使有大量金流入呢類板塊，亦較大機會選擇蟹貨少嘅股份。

另一個炒新唔炒舊嘅原因，係舊一批新經濟股當初曾有足夠客流量，但未能成功變現，亦未能橫向縱向增加服務範圍以產生協同效應，加上被更強競爭對手複製、改良模式同將之邊緣化，久而久之客戶停留時間及交易宗數減低，令到估值開始一文不值，美圖係典型例子。

新跑出嘅股份，營運上比舊一批更進一步，同時賣個博彩新機會畀你，呢個板塊嘅炒風，歷史會不斷重演，因為AI、AR、大數據改變世界嘅轉捩點一步步逼近，投資者必然擁抱機會。

晉佳