【毒L經典三部曲】基仔笠頭唱「其實毒L一個更開心」應節 怕古太聽到
單身情人節毒男應節
每逢佳節倍思春,Dear Jane於2016年唱咗首《中秋你注定一人》應節,陪單身男驅走孤單嘅感覺,加埋2009年嘅《毒男》,同2014年《你當我是毒L吧》,呢三首都可謂「毒L經典三部曲」,睇怕單身者今年又要playlist早已預備。
今日係一年一度單身人士最難捱嘅日子,網上見人放閃,街上愛戀滿滿,古巨基剛才喺facebook貼咗一條片唱出2009年改編自《愛與誠》嘅經典網絡神曲《毒男》…真係哼一句「其實毒L一個更開心」就會記得。
其實毒L一個更開心 洗L你講
其實毒L早晚留在家 卻扮忙
恨有港女可碰撞 然而無聊事幹 不敢打搞對方
每日上住網 女優找幾趟 ACG女卻更加好看
不要哭 我也想不到這幾年來要脫毒
沒法真的脫毒了 聽到呢隻歌會好滿足
基仔改咗少少歌詞,喺片中就話:「如果你仍然係單身,聽到呢隻歌會好滿足,就將呢隻歌送俾你,今日係2月14剛剛踏入12點,今日應該一街都係情人節快樂嘅祝福,今日仍然係單身,我祝福你單身都係咁快樂。」基仔又指知呢首歌喺高登hit咗好耐,好多網民都有叫佢唱,所以佢先趁情人節唱兩咀,最後祝單身嘅朋友,今天無懼放閃,毒L也可以好快樂。
之不過好多網民好奇,佢做乜要匿喺被竇唱歌,基仔自爆:「怕被古太聽到。」
o依家連基仔都玩埋一份,唔知容祖兒(Joey)幾時「找數」同農夫錄禁歌《港女收港男皮》!?