「神奇小子」曹星如（Rex）出戰約旦奧運拳擊資格賽如箭在弦，假如他最終躋身前六，即成56年來首位打入奧運的香港拳手，比賽在即，曾經與他同門訓練的潘啟情（Raymond）陣前點出Rex擁經驗優勢，而且步法速度比從前大有進步，且看他能否把握機會，於芸芸好手中脫穎而出。

Rex自2017年對決河野公平一役受傷後，未有繼續職業生涯，反轉戰業餘拳壇挑戰奧運，然而兩種拳擊賽風格迴異，單論回合數，前者動輒打上10、12回合，後者以三回合決勝，有人比喻兩者分別似長跑和短跑之差，職業拳手適應速戰速決的難度甚高，Rex也嘗言須長時間去摸索業餘拳擊節奏。曾為Rex同門師弟的Raymond明言Rex以往比賽前數回合習慣試探對手，身體記憶或成習慣，為免浪費機會，他認為Rex務要擺脫慢熱風格，「業餘拳擊如果用一回合離睇對方係好奢侈 ，爆發力係好重要。」不過兩人近年曾對打切磋，Raymond感覺Rex閃避速度遠超昔日，漸漸投入業餘風格，「以前佢力量好啲，但轉業餘之後步法同埋頭嘅閃避速度都比以前好咗好多，我好難打中佢個頭，打十零廿下，可能一下都唔中，而且佢距離控制又比以前好咗。」

坊間不少言論認為，多數參加奧運拳擊的運動員年紀輕輕，拳怕少壯，年屆32歲的Rex或有體能劣勢，而且不似職業拳賽起碼相隔半載再戰，奧運拳擊資格賽一連八日舉行，拳手體能負擔極大，但Raymond認為Rex足以用經驗搭救，「佢嘅對手好多都係20出頭，新陳代謝快啲，不過始終Rex打職業拳擊好耐，經驗好豐富，甚至曾經同世界拳王對打練習。」Rex征戰沙場多年，經驗豐富，然而亦屢次受傷，頭部和眼部創傷尤其明顯，拳頭無眼，Raymond表示業餘拳手為要令裁判留下主導賽事的印象，傾向攻擊對手頭部，故Rex必要小心受傷，「傷勢預防同保護真係好重要， 眼角爆真係好影響下一場，花士苓搽完之後嗰刻係好快無事，不過人哋亦都好容易拳套一擦過就令到你又出血，都係嗰句『Protect yourself at times』（無時無刻皆要保護自己）。」

奧運資格賽採淘汰制，賽事形勢多變，Rex入奧之路變數眾多，「籤運」同樣關鍵，今次賽事各路人馬眾首約旦，Raymond特別點名日本57公斤級的代表堤駿斗，此子為日本拳擊超新星，前手難以捉摸，被喻為「井上尚彌二世」，Raymond不諱言「如果對住佢，佢係一個非常難纏嘅對手。」

奧運拳擊亞大區資格賽資料
日期：2020年3月3-11日
地點：約旦安曼
港隊代表：歐盈盈（女子51公斤）、譚駿軒（男子52公斤）、曹星如（男子57公斤）、陳嘉華張汛珩（男子63公斤）、陳嘉華（男子69公斤）和簡亮泰（男子75公斤）
奧運席位：63個，每量級前4至前6入圍不等

記者：洪量丰
攝影：何量鈞

-------------------

《果GYM》隨身播 　健身壹App過！

NIKE特選課堂　2-4月期間限定
一按即玩
--------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
--------------------
【撐學生】召集有心人 撐學生全年睇《蘋果》
立即按此
--------------------
《體蘋果》陪你睇波講波
https://www.fb.com/appledailysports