法國四季豆清甜爽脆

蘋果日報 2002/05/23 08:00


平時見慣嘅四季豆都係青色嘅,呢種黃色嘅四季豆令我大開眼界,前兩日同老公行街無意中至發現到,原來佢係嚟自法國,暫時只得超市至有得出售。鍾意試新嘢嘅我即刻買包返去試啦,果然係一分錢一分貨,質素有番咁上下,食落好爽口,唔單止豆莢係黃色,連豆仁都帶淡黃,但就比較細粒,清甜爽脆,食落一啲都無渣,大家可以考慮試試!

$9盒city'super有售
三點蟹 又出籠
早前啲三點蟹咪多膏到漏出嚟,跟住就唔太覺眼有三點蟹賣。原來要到夏天先至又係三點蟹當造嘅季節。不過由於現在只係剛剛開始多,所以唔係話好大隻,都係四、五両重佔多數。不過三點蟹味道唔錯,夠鹹香,細細隻斬兩件再炒食都好味。

約$30/斤 各大魚檔有售
龍眼 價格穩定
我老公就至鍾意食龍眼,所以龍眼一上市佢實知道,佢話今年龍眼提早上市,價格穩定。雖然我唔係龍眼迷,但食龍眼真係唔錯,佢滋潤但無荔枝咁燥,好啱老人家及小朋友食。
剛上市嘅龍眼主要係嚟自泰國,肉質清甜爽脆。食龍眼最好用手去搣殼而避免用口去咬,確保衞生又安全,呢個都係我老公教㗎!

$10磅 各大果檔有售