Anglybaby同黃曉明拍拖到結婚到生仔，人前經常表現恩愛。黃曉明更不時為Baby製造驚喜，仲記得3年前Baby 25歲生日，黃曉明就送咗架林寶堅尼俾壽星女，雖則事後有人check到呢架跑車係Baby有份嘅Mini Nail Limited公司持有，令人懷疑Baby當日交戲扮驚喜，(新聞連結： http://bit.ly/2lOMzoX )不過海綿大哥對Baby嗰份心思，咁多年都冇變。

就好似今日係Baby 28歲正日生日，噚晚曉明大哥就專登為Baby喺灣仔君悅酒店開Party搞驚喜。(新聞連結： http://bit.ly/2lR0Gs9 )受邀嘅圈中好友除咗有向華強同向太陳嵐外，原來仲有黃曉明多年老友趙薇。

今日下晝，趙薇就喺微博貼咗張生日Party相。相中壽星女挨實老公幸福甜笑，至於趙薇就搵兩個拳頭遮住下巴，趙薇貼文話：「生日快樂，永遠的美女少戰士！快樂的相聚。祝你永遠幸福，甜蜜一生……鏡前遮臉顯瘦法，適合各種人群，哈哈！」相中見趙薇同黃曉明面紅紅，應該飲咗唔少酒， 夠晒盡興，不過唔知Baby同曉明幾時先帶小海綿見吓Uncle、Auntie呢！