剛周三（3日）谷草夜馬，上演一幕「馬場奇遇記」，今季煞科後掛靴嘅蘇狄雄（外號狄狄仔）演出神勇，連爆「翹軍」同「神舟寶駒」兩隻大冷門起孖，「翹軍」更係284倍巨型冷門。

如果閣下買中，真係戥你開心。

蘇狄雄係2008至09馬季出道，目前喺香港共贏出153場頭馬，呢個數字唔算多，但呢位華將就有一項另類數據排緊榜首。

佢係現後香港騎師之中，爆99倍巨冷次數最多嘅騎師，總共有三次，除咗上期嘅「翹軍」，仲有上季嘅「旅遊首席」（1,156元）同2012年5月嘅「金威勝」（1,606.5元）。

幾位師兄弟緊隨其後，潘明輝、梁家俊、黎海榮、何澤堯都爆過兩次99倍，睇下有冇人可以追平阿Ben（蘇狄雄之洋名）嘅紀錄。

潘頓同莫雷拉嘅叫座力一向強勁，兩人嘅座騎好難會冷到99倍，前者最冷嘅一場頭馬係2011年2月9日嘅「經典能量」，呢匹姚廐馬嘅獨贏彩金派850.5元，而莫雷拉最冷嘅頭馬「威力名城」都只不過係37倍。

練馬師方面，目前居榜首嘅姚本輝、榜尾嘅何良同方嘉柏都係爆冷專家，從練以來先後五度爆出99倍大冷馬。

反而「盃王」大摩未試過喺香港練出一匹99倍頭馬，最冷嘅頭馬「得運寶」係93倍，賠率未算最誇，大摩仲有一個月就散倉，睇下會唔會係呢段日子實現「創舉」！

撰文：林湛穎

--------------------------
【馬上看經典】迴光反照莫此為甚！「奔騰」創遮打盃另一經典
即睇今期《馬上看經典》
--------------------------
馬匹賽績、騎練數據、名家貼士
【最強贏錢武器盡在蘋果馬網】
刨馬撳呢度
--------------------------
《果GYM》隨身播　健身壹App過！
一按即玩