Soler官司巨債 重拳反擊
水剋火。金融海嘯撲熄無數人熾熱夢想,憑《海嘯》、《失魂》唱出名堂的Soler,因為與前經理人一場合約訴訟,人氣事業遇海嘯一樣被冲散。官司敗訴,Soler需賠償500多萬,孖仔決定上訴。若上訴失敗,就要撲水。轉投新公司,要賺錢不難,但孖仔說:「我哋唔想因為錢,影響我哋一直堅持嘅方向。」心中那團火,原來從未熄滅。
撰文:胡比
正當Soler要獨力對抗這場海嘯時,幸好有貴人伸出援手,未等他們與前經理人「蜂鳥音樂有限公司」的合約訴訟完結便與他們簽約。加盟bma唱片公司的孖仔日前坦言:「好多謝羅生(羅傑承),入咗一間大公司,多咗人手,好多嘢都多咗backup。」
沉寂年多,未來可能要為官司背上500多萬債項,問Soler曾否有一刻心灰意冷?大哥Julio說:「冇喎,我哋相信自己嘅藝術,保持信心,只係有一個問題,係唔會咁易放棄,我哋個心好強壯㗎,只要保持正面嘅態度,就算有幾多個欄,點都會跳得過。」說到官司,孖仔決定上訴。
五行欠水,對於這筆賠償,Soler未有想過要向新公司借錢,也不會因為急着要還錢而胡亂接工作,細佬Dino謂:「其實老闆都有提出過,有乜嘢幫手就出聲,不過我哋覺得自己嘅問題係要自己解決,但好感激老闆嘅心意。」Julio則說:「我哋唔想因為錢,影響我哋一直堅持嘅方向,唔會咁輕易改變,啱我哋嘅方向先會做。」
與前經理人合約糾紛期間,Soler曾自資推出一張國語加英文碟,落手落腳做埋宣傳,惟因官司在身,很多人怕麻煩,不敢起用兩人。適逢遇上北京奧運,內地所有宣傳都要停止,台灣變成了孖仔唯一不受影響的地方。
Soler回想早前到台灣發展,由零開始,當是磨練。
Soler在當地逗留了兩個多月,由新人做起,當是一個磨練機會,其間遇上令他們感動的事,Julio說:「最記得台灣嘅名主持徐乃麟同曾國城,佢哋知道我哋喺香港嘅事,見我哋自資出碟,覺得我哋好勇,唔止喺幕前對我哋好,幕後仲不停鼓勵我哋,同我哋擁抱、叫我哋加油,我哋好感激。幕前要扮幾好都得,但幕後咁做,係唔使扮,我覺得佢哋好真誠。」
新碟《Canto》即將推出,Soler首張他們監製的全廣東大碟,今次嘗試很多以真樂器做的歌曲,希望令樂迷明白,band友不一定嘈吵,也可以有抒情歌,但當然少不了有搖滾音樂,其中一首《鎮定》,就由好友黃貫中填詞,靈感來自他們小時候愛看的漫畫《北斗之拳》的主角拳四郎。
Dino說:「有一幕係拳四郎企喺條街度,周圍嘅高樓大廈突然間跌晒落嚟,不過佢依然好鎮定企喺度。」Julio續說:「歌詞入邊有句俾人打就要企定,唔使緊張,對自己有信心,就好似我哋之前俾人告嘅情況一樣,呢首歌都可以話我哋嘅心聲。」
攝影:陳慧安
Soler感激老闆羅傑承(左)伸出援手讓他們有大公司照顧。
Julio與Dino雖然是孖生兄弟,但性格迥異,特別是感情事,Dino顯得落落大方,坦言現與女友感情非常穩定,所以不介意大方承認戀情。Julio恰恰相反。每談到與前緋聞女友、Cookies餅碎Angela的戀情,Julio總刻意迴避,有時甚至會黑面。
Julio解釋:「我覺得私人嘢唔想成日同人講,如果有人真心關心我,我係冇問題,但有啲人只係多事好奇。屋企同感情都唔想講咁多,尤其感情,係會影響到另一個人,拍拖嘅時候大家都希望好,但一段關係未穩定,分手之後,再同第二個拍拖,人哋會問、又覺得你花心。我唔想個女仔第時同另一個人拍拖,又會俾人問番之前嘅感情事,所以想低調。如果係結婚對象,我好樂意同大家講。」
Julio被問到與前緋聞女友Angela的戀情,總是不願多談。資料圖片