「寶馬冠軍一哩賽」自2001年起，年年由香港一哩王捧盃，單係大摩馬房嘅「步步穩」就分別在2007與2010年捧盃兩次，而告東尼馬房嘅「牛精福星」亦在2005及2006年連續兩年贏冠軍。今年呢，大馬主羅傑承曾經用咗幾千萬銀買馬，如「永不回望」、「羅馬」、「皇馬」、「軍事行動」、「軍事攻略」、「羅馬奔騰」等等，卒之由大摩精心調校嘅「軍事攻略」奪標嘞，羅傑承梁芷珊夫婦坐上寶馬開篷車在馬場跑道巡遊，好不威風，經此刺激，相信馬主羅必定更不惜大灑金錢買靚馬來港，希望贏到打吡與國際賽。馬會總裁應加柏建議「軍事攻略」去跑安田紀念賽，大摩就話安排隻馬去英國跑皇家雅士葛之安妮皇后賽，去邊度好呢？去英國更加威風噃，前年「蓮華生輝」去雅士葛，馬主得到機會與英女皇見面，影番張相已經夠威威啦，贏埋冠軍更唔得了。
寶馬冠軍一哩賽跑完後翌日，大家返番工嘞，左丁山收到「寶馬香港」送來一個郵包，秘書拆開一睇，竟然係寶馬之請柬，附送馬牌入場睇冠軍一哩賽，秘書見到，笑埋一份：「唉吔，你走寶嘞，miss咗㖭！」閒事啦，又唔係miss咗三星法國廚師嘅正宗法國餐，駛乜可惜啫。不過四月廿五日係假期兼跑馬，好多人唔慣，左丁山人在馬場刨馬之際，竟然收到肥佬黎電話，佢話：「點解你今日喺馬場呀？唔使返工咩？我喺台灣開緊工噃！」騎騎，大家都係開緊工啫，不過「公事」不同之嘛。