【畀啲新意得唔得】雲格閂定後門 天價收購唔使諗
車路士受傷比利時英超夏薩特英國足球
雲格續約阿仙奴兩年,對廠迷嚟講真係唔知係好消息定壞消息。部份廠迷一直不滿佢收購新兵成日慳住慳住,但雲爺爺既然約已續,有咩訴求一於話之你,講明未來買人都唔會花大錢。
雲格接受電視台訪問時,話唔會同英超列強玩軍備競賽:「今年夏天我哋會簽兩三個新球員,阿仙奴唔同其他英超豪門咁,有好似使之不盡嘅金錢,當然要使錢的話我哋都有能力做到,但呢個亦係我哋長期以嚟理財有道嘅結果。球會一向唔重視要花幾多轉會費,使得多又唔代表成功,你睇洛賀丁係咪一筆巨額收購?你使4,000萬鎊去買一位球員,大家都拍爛手掌;不過用200萬鎊買返嚟嘅球員,佢亦有本事踢得好。」
長篇大論其實都係老掉牙嘅結論,廠迷都唔使期望阿仙奴喺新一季英超季前有乜重大收購,繼續行舊路慳住使。