何紫綸、筱靖等今晚喺尖沙嘴出席「環亞美神大賽12強佳麗誕生」記者會，佢哋擔任評判，大會喺今日下晝已經進行面試。（新聞連結： http://bit.ly/2sqOfsT ）

選美出身嘅筱靖話好重視呢類比賽，通常係以靚為主，但今次主題係素人變女神，啲參賽者冇乜點打扮，睇到幾驚喜，佢仲話：「見到佢哋，回想起自己從前嘅青蔥歲月，今次見到啲佳麗好激動咁喊，可能平時少有平台演出機會。」筱靖另外話最近忙緊搞公司清盤嘅事，因為同股東意見不合，件事已交畀律師處理。

至於何紫綸本身有成立經理人公司，佢話會等大會揀剩，再睇吓有冇合適嘅女仔可以簽約：「公司想簽啲識唱歌跳舞嘅女仔，都睇中咗一啲，不過佢哋有啲冇化妝又唔重視儀態，上台好冇儀態，都幾驚訝，想入娛樂圈需要做好準備，上台應該要有儀態同夠大膽。」另外，佢話啱啱同老公去完溫哥華度完蜜月返港：「通常啲人結完婚就即刻去度蜜月，但我結完兩年之後先去，不過今次去試玩咗好多嘢，全程由老公安排，都玩得好開心。」