蔡瀾今日喺中環長江中心出席《蔡瀾蘇美璐書畫聯展》，現場展出由蔡瀾親手寫其故友黃霑嘅填詞作品《獅子山下》及《滄海一聲笑》作品，下款更寫上「憶老友」三字，倪匡夫婦同鍾楚紅都有現身捧場，不過紅姑就未有接受訪問。

蔡瀾表示今次展覽籌備過程好輕鬆：「之前喺北京辦完書畫展，香港今次就冇咁嚴肅，所以題咗黃霑嘅歌詞，輕鬆啲唔使說教，等年青人容易接受，好似播一粒種子培養大家對書法興趣，唔使成日玩手機同電腦。」

蔡瀾話自己好鍾意霑叔嘅歌詞，尤其喜歡《問我》同《滄海一聲笑》。又透露大陸同海外有唔少地方都邀請佢辦書畫展，蔡瀾話自己好被動，總之咩地方都無所謂：「但要輕輕鬆鬆，唔好刻意，唔想做人咁辛苦。」

而同埋太太嚟捧場嘅倪匡，氣色紅潤兼好好清神嘅佢接受訪問時，問到見到霑叔嘅詞有否特別感觸？佢話：「冇呀，都咁多年，人都去咗咁耐。」見到蔡瀾用字畫懷念老友，倪匡又會用咩方法去懷念佢哋？ 倪匡話：「我發夢，但一次都未見過，幾個去咗嘅老友都未見過，明明約好走咗都要繼續聯絡，點知影都冇，日日掛住都冇用。」

對於佢嘅著作《衛斯理》系列推出劇集，佢話：「我知道，我老啦人糊塗，唔會睇劇。」又話自己老到千瘡百孔，平日甚少出門又滴酒不沾：「以前唔飲唔得，o依家唔飲都可以，以前三支白蘭地閑閑地，o依家三啖啤酒都頭暈。」又透露新抱周慧敏經常都會探佢，但對抱孫一事就輪唔到佢話事，一切順其自然。

精選娛聞，喺晒《娛果》
http://fb.com/appledailyent