今季喺熱刺坐冷板居多嘅前法國U21球員尼高杜，近日有張連犯兩大忌嘅照片喺網上流出，激嬲熱刺球迷。

去年夏天由馬賽過檔嘅尼高杜，畀人發現佢最近着住另一間倫敦球會車路士嘅練習衫，同球迷影相。聽到呢度，相信好多「刺粉」已經好嬲，但更加過份係，同佢影相嗰位小球迷，竟然係着住阿仙奴波衫，應該係呢間熱刺北倫敦死敵嘅粉絲，即係話佢連犯咗兩宗罪，激到「刺粉」呼籲球會即刻賣走呢位22歲小將，唔好再俾機會佢。

本來有人亦質疑張相係咪假相，會唔會有人做咗手腳，點知尼高杜竟然喺網上自認，話件練習衫係佢前馬賽隊友、家陣效力車仔嘅巴舒亞伊送畀佢嘅，但就冇解釋點解會同兵工廠球迷影相。總之，尼高杜睇嚟一身蟻，下季見唔見到佢喺隊內都成疑問。