馬匹名字一向千奇百趣，總會令人感到奇怪，就如「點解」、「咪走寶」等，今期第十場有駒叫「邊個邊個」，馬名都幾盞鬼。

「邊個邊個」馬主AA84團體經理人許坤華，一向啲馬都以「劍」字行頭，但呢隻馬一反慣例叫「邊個邊個」。

許生表示靈感來自此駒英文馬名Mr So And So，佢話外國人話人So So，代表唔係咁叻、馬馬虎虎咁解，所以一見到Mr So And So，腦海就浮現「邊個邊個」，而感覺上又幾得意，所以就以此起馬名。

蔡約翰馬房的「邊個邊個」在從化訓練兩度試閘，做好工夫先跑今次（22日）第十場二班1400米，當然唔會好似So So咁渣啦，肯定要留意！

至於許坤華太太葉思貝有份的團體馬「愛馬劍」，將跑第九場三班1400米。

許太組織的香港愛馬女士協會早前舉行時裝表演暨慈善晚會，共籌得約38萬元分捐三間慈善機構。

所謂善有善報，且看許氏夫婦能否夾手夾腳，捧走今期第九口孖寶。