連救5個set point，梅禮贏得精采！周五溫網男單第三圈，主場出擊力爭衛冕嘅梅禮，面對28號種籽意大利球手科尼尼陷於苦戰，其中第4盤面對5個set point仍能一一挽救，包括把握科尼尼喺領先局數5:3、40:30時用盡「鷹眼」挑戰機會後誤叫「challenge」失誤，最終呢位頭號種籽藉無壓力犯錯遠比對手少30次下，經歷2小時39分鐘激戰以6:2、4:6、6:1、7:5擊退科尼尼，連續10屆躋身第四圈，下一關對手係法國嘅柏利。梅禮賽後坦言：「我唔認為自己打出最佳水準嘅網球，今日甚至有啲手緊，但我總算能夠過關。」

女單方面，賽前捲入導致一名老翁身亡交通意外嘅「大威」威廉絲暫時克服傷痛情緒，第三圈以7:6、6:4擊敗日本球手大阪直美，下場對手係克羅地亞新星干祖；而當地警方亦獲得閉路電視錄影片段，證實大威當時正確按照交通燈號駛進發生意外嘅十字路口。另外，應屆法網女單冠軍奧絲達賓高，以及烏克蘭4號種籽施維杜蓮娜同樣晉級，兩者將會喺第四圈正面交鋒。