Captain Nancy開騷喇！今晚薛家燕嘅《The Sound of Nancy 薛家燕愛你無限60年演唱會》喺紅館舉行，曾江夫婦、歐陽震華夫婦、Bob、姜麗文、吳若希同老公、黑妹、盧海鵬、蓋鳴暉、馬海倫、陳曼娜、朱慧敏、米雪等等都有嚟到支持，在場大部份都係上年紀嘅歌迷，有唔少舉晒燈牌。

晚上8點半演唱會開場，家燕姐喺台中升降台出場，當然就着番佢套Captain Nancy衫，仲邊跳十字步邊唱《Captain Nancy》，到咗唱《乜都盞》，家燕姐去到台邊同fans邊揮手邊唱，唱完兩首之後佢就返落台底。

喺唔見家燕姐呢段時間，場內螢幕播出家燕姐60年前、8歲時做童星嘅片段，之後到咗《開心女人cha cha cha》，家燕姐就換咗一件彩色直間閃閃貼身裙，同女dancers跳cha cha，唱完之後家燕姐話：「多謝大家，做咗60年真係唔簡單，過程中有起有落，或者有辛酸嘅時間都一一接受，過程亦學到好多嘢，識到好多朋友，好感恩有佢哋同大家，自己年輕時好多人追，因為十零歲卜卜脆。」之後修哥就出場唱《往事只能回味》，着住黃色西裝嘅修哥合唱完家燕姐話8歲開始同修哥合作，由做佢個仔、個妹到情人。

精選娛聞，喺晒《娛果》
http://fb.com/appledailyent