阮民安（Tommy）噚晚喺沙田舉行「沒有國泰還有民安2.0演唱會」，免費招待學生入場睇騷，未開騷前，司儀先請現場觀眾坐低，然後大叫「香港人加油」，現場仲放滿「光復香港 時代革命」等抗爭標語。演唱會喺8點半開始，先由一班着黃雨褸嘅小朋友出場大嗌︰「香港人」，觀眾則接着叫︰「報仇」，之後現場播出《願榮光歸香港》音樂，眾舞蹈員就扮抗爭現場，「守護孩子」陳伯出場演出抗爭短劇，當眾舞蹈員打開雨遮後，一身黑衫嘅阮民安就唱《願榮光歸香港》現身，然後帶領現場大嗌口號「光復香港」、「香港人抗爭」熱身。

寸張建宗無恥

阮民安喺台上問︰「今日大家安全嗎？啲警……有冇搞嘢？點解咁問呢，因為個騷風雨飄搖下搞得成，有啲騷連唱《願榮光歸香港》都要cut，有啲頒獎禮都係，所以大家好勇敢，你哋有冇戴口罩？唔好好似張建宗咁無恥話冇事。」之後阮民安一口氣唱咗《六月飛霜》、《再見四一》及《和你飛》等抗爭歌曲，佢仲叫觀眾將白色鮮花放喺台前。

之後由「守護孩子」陳伯分享當日抗爭經歷，陳伯話：「我哋要救年輕人，我哋唔可以放棄佢哋要繼續戰鬥，你哋係香港未來棟樑，將來靠你哋，陳伯同年輕人、有良知嘅香港人會走到勝利。」其實去年9月，阮民安喺網上號召舉行演唱會，先後申請旺角麥花臣場館和灣仔伊館都被拒，令佢一度被質疑食人血饅頭，事隔4個月終於開騷，噚晚理大廚房佬上台，就代阮民安澄清：「啲人話Tommy食人血饅頭，你覺得佢唱歌唔好聽自己去唱，好似阿叻肥媽咁，睇吓有幾多人聽。」

其實，喺噚日晏畫綵排，阮民安已經話︰「呢個騷終於喺風雨飄搖下開到，除咗之前場地，最近仲有肺炎咁大件事發生，喺好困難至做到呢件事，好多手足同兄弟姊妹過嚟幫手，連埋dancers同band約50人，現場市集部份收益賺到嘅錢，都會用嚟幫嗰啲流亡喺台灣手足。之前去台灣接觸佢哋，知佢哋好艱苦，前路茫茫，喺黃色經濟圈之下，騰空咗啲攤檔畀佢哋賣嘢，至於佢哋捐幾多就隨心。」佢仲話噚日有手足喺唔同位睇住，避免有人搞事，又話希望以後有更多黃色藝人可以開騷。
撰文：馮仁昭