會計師公會將於下周五（16日）舉行EGM，表決由少壯改革派提出的「一人一票選會長」提案。隨着四大行決意反對方案，一直不表態的公會理事會亦已歸邊，向會員發信表明反對立場。更有會計師同我哋講，屬於四大行合夥人的公會理事，通過公司內部電郵，要求員工出席EGM投反對票，又建議員工一旦去唔到投票，都要將投票授權交畀指定的公司代表。
今年初，四大行之一羅兵咸永道（PwC）已經爆出有合夥人透過公司電郵，要求員工喺公會投票畀指定人選。我哋知道，同樣屬四大之一嘅畢馬威（KPMG）會計師事務所合夥人重施故技，利用公司網絡，要求員工於公會EGM上反對「一人一票選會長」。

電郵由畢馬威會計師事務所合夥人鄒小磊發出。他在信中花咗大篇幅闡述現行選會長制度好處，又指「一人一票」雖然在概念、情感上吸引，但還是維持現狀好。鄒小磊最後在信中寫道，「我建議閣下，親身出席會議反對議案（場地位置有限），又或透過委任代理人，為你投票……我建議你可委託大會主席，或KPMG註冊會計師『XXX』，作為代理人，為你投票。」
一般打工仔，面對老細透過公司電郵，明示你投票反對，暗示你將手上的一票交出嚟，你會點做？可能好多人會屈服。不過有KPMG員工同我哋講，對此感到不滿，打算親身出席投票支持議案。
此外，會計師公會寄發給會員的資料，立場講到明絕大部份理事係反對「一人一票」。
會計師公會醞釀變革之源，要由組織架構講起。會計師公會有14名理事，任期兩年，每年改選7人，由會員以「一人七票」直選產生，另外6名為政府委任代表，會長則由理事互選產生。由於投票率長期只得一成多左右，行業龍頭四大行憑更佳動員能力，手上又有多票可以互相支持，一直雄霸理事會多個席位，間接壟斷了會長、副會長等人選。

公會會長往往負責設定議程，擔當與政府溝通和談判的重要角色。鄭中正、龔耀輝及馬振峰等改革派一直批評，理事會的決定往往照顧大行，並非面對會員。佢哋希望會長改由直選產生，可以帶動會員更積極投票，令到會長更直接面對會員。
據我哋所知，喺舉行EGM之前，改革派曾經在會計師公會理事會上提出，諮詢「一人一票會長」方案，但竟然有理事表示，一旦諮詢必定得到很多支持，所以索性唔做。相反，選理事由一人七票改為一人一票，未必有咁多人贊成，就可以諮詢。最後改革派惟有搵夠人簽名Call個EGM，交由EGM表決建議。
由會員大會表決應否改變選舉制度，均均真真，會計師話晒係專業人士，應該有獨立思考能力，唔需要上司咁多指示。大家冇必要搞太多小動作，令人覺得有意影響投票的公平性。

周大福珠寶（1929）係今年集資額最多、市值最大的新股，不過本招股書就係近期眾多IPO中最薄，只得大約290頁，比起賣果凍的中國休閒食品（1262），以及幫Coach和Prada代工生產手袋的時代集團（1023），仲要少幾十頁，認真環保。如果計P/P比率──即係集資額（Proceeds）除招股書頁數（Pages），周大福應該攞今年第一。

有份安排周大福上市的中環人解說，今次係刻意寫一份精煉而易讀的招股書，但佢強調沒有犧牲到質素，要有的資料都有多冇少，上市科同埋上市委員會都完全收貨。過去好多招股書，閒閒哋五、六百頁，成千頁都試過，但係長未必好，內容重複，句子又長又難明，廢話充斥，大大減低本書的可讀性。佢話今次周大福管理層、律師、投行等各方面都十分配合，同意將本書寫得淺白易明一啲，等一般散戶都睇得掂。
唔計會計師報告等附錄部份，招股書最長的部份通常係「業務」同埋「財務資料」兩部份，但這兩部份好多數據周不時重複表達。周大福刻意精簡下，兩部份夾埋只係用咗74頁，同期招股的海通（6837）和新華人壽（1336），分別長達152頁和137頁。
但本書亦有精簡過龍的地方。我哋對於原本實益持有34%周大福股權的一眾神秘股東身份，招股書未有交代，覺得奇怪。鄭家純話，神秘股東包括親戚和生意夥伴，咁究竟係乜水？點解唔講得？係咪協助周大福發展中國生意的夥伴，不願意曝光？我哋仍然好奇，亦冇乜線索，但係可以肯定同招股書慳紙無關。