李冰冰﹑金像影后瑪莉安歌迪娜(MarionCotillard)﹑法國前第一夫人CarlaBruni﹑LVMH集團太子女DelphineArnault﹑韓星金秀賢(唔係星星嗰個呀﹗)﹑美國影星DakotaFanning等,於法國時間9月26日下午兩點半,出席巴黎舉行嘅Dior2015春夏騷。
李冰冰及瑪莉安都係貴賓,冰冰以白色打扮坐喺第一排睇騷,佢喺開騷半小時後到場,更獲分配坐喺「主家席」,與男裝設計師KrisVanassche﹑超模NataliaVodianova﹑Dior珠寶創意總監VictoiredeCastellane坐埋一齊。
睇完騷後,冰冰於後台與女裝設計師RafSimons合照及傾偈,認真面子十足,反而韓星金秀賢(唔係星星嗰個﹗)冇得入後台。
冰冰受訪時大讚個騷好好睇,又話好鍾意啲衫,佢表示會喺巴黎逗留幾日,暫時就未有新戲接拍,目前仍然休息當中。
冰冰表示剛由美國飛過嚟,於當地出席完聯合國氣候峰會,有份上台演講,佢表示場面好盛大,係一生一世嘅,佢又話當日自己冇乜時間準備,又話由化妝都準備出台演講,都係得幾個鐘,感覺好震撼,佢話中國人有句說話:「有志者是竟成。」
及後冰冰再接受國內媒體訪問,佢表示自己已嚟過巴黎,對呢個地方好熟悉,覺得今次嚟睇騷,心情好輕鬆。冰冰又大讚品牌白色衫好靚,咁啱自己都係着白色衫嚟睇騷,而佢本人好鍾意白色,覺得啲衫融合好多唔同文化,好似有少少中國風,覺得呢隻牌子好優雅,自己相當喜歡。