黑暗時代分享旅遊趣事 前記者Ling：望傳達一絲慰藉
蘋果日報 2021/06/23 19:13
Ling is travelling
好友任機艙服務員期間給她一折機票，她3年內去了21個新國家，兩人曾同遊斯里蘭卡。（受訪者提供）
香港人經歷2019年反修例運動，2020年便緊接要面對世紀疫症。在極低氣壓的香港，荒唐的消息每日如雪花般飄來，港人碌手機時，大槪總希望從中尋找一些慰藉。永續疫情，航班停飛，人人冇得去旅行之際，前記者呂珠玲（Ling）於去年4月在社交媒體開設旅遊專頁「 Ling is travelling」。每日一篇短篇遊記，連結她過往多年旅行經歷與本港時事政治。她微小的願望是在這個時代安慰香港人，希望香港人日常生活學會並實踐backpack的哲學 — be water。寫在蘋果的最後關頭，學佛的Ling說，「即使蘋果真係俾人隊冧咗，人都係要生活㗎。我哋咪要學習冇咗蘋果，都要識點樣去分享資訊囉！」
她每次看新聞，總會連結到某些過往旅行經驗，而旅行時到訪不少景點，則會令她想起政治新聞，例如到訪阿根廷的五月廣場，在dirty war期間不少後生仔「失蹤」、異見人士被捕。一班母親每個星期四都會到那廣場示威，「件事已經發生咗幾十年，但我去到仍然覺得好震撼，我即刻諗起六四。我係去到邊度旅行，都會諗起香港發生嘅事。」
70年代阿根廷軍政府濫暴濫殺，很多年輕人被失蹤，即使軍政府後來倒台，他們的母親每星期在廣場聚集要求清算殺人政權。（受訪者提供）
每次旅行的bucket list，必定包括當地的現代歷史博物館，講述二戰經歷、國家如何爭取民主，例如阿美尼亞有關大屠殺， 「死咗好多人都冇人知，慘無人道，亞美尼亞的人慘咗一百年，宜家終於話係種族滅絕；吉爾吉斯都曾經有茉莉花革命，但很快就PK咗，慘淡收場。」
令她最深刻的是俄羅斯，「好多博物館都數臭史大林，講佢用好多白色恐怖牢牢抓住個政權。死咗之後，差唔多每個城市都有個關於佢罪行嘅博物館。呢啲好震撼！大佬，呢啲真係有天讉㗎！」
她認為很多地方的政治黑暗到甚至沒有人理會，但香港從來都是世界焦點，「香港咁樣嘅示威規模，其實係世界各地好多㗎，更慘烈、警暴更嚴重嘅大把。但邊一個示威咁耐長期都係紐約時報嘅頭版？呢個真係香港嘅獨有之處。」
亞美尼亞上世紀被土耳其屠殺，亞美尼亞人從未放棄爭取公義，最近美國政府確認那是種族滅絕。（受訪者提供）
她的page現時已有逾9000個likes，其實她不只寫政治，還會寫生活及她的佛學思想，「好笑嘢啲人反應係會大啲，留言係會熱鬧啲，一齊鬧一齊笑；但係最多人share嘅，係窩心、知識性嘅post。我覺得香港人都係尋求安慰。」
在這個時空開設這專頁，某程度是回應香港人需要。Ling認為有些人未必識懂得表達感情，「有時佢哋可能好嬲，但佢哋用唔到一啲文字或說話表達出來，壓抑到一個地步，直情係無言。如果有人可以用一啲輕盈嘅文字表達，唔係一定寫好多理念哲學，只係一段好簡單嘅文字，和應到佢哋心聲。」
她身邊亦有很多朋友因最近的政治環境而感到壓抑。直至有人在她的帖文下留言說：「谷咗幾日，見到個post先識得喊。」Ling說：「我估好多人都係咁，只不過係有個人幫佢表達到佢哋諗到啲咩。」她又謂：「好似出奇蛋，一篇文章兩種感受。」這令她覺得，如果專頁可以安慰一下大家，「引下大家笑，咁都幾好吖。」她暗暗立下心願，就是要日日寫，寫到大家可以去得返旅行。
Ling直言希望日日寫，寫到大家可以去得返旅行。
佛學知識，旅行經驗，加上時事議題，這個page集合Ling多項興趣及專長，「有時再介紹下黃店，讓同路人互相支援。我就發現原來真係有樣嘢可以滿足三個願望。」而讓她堅持日日寫的主要原因，全是讀者，「你見到咁多人留言話你知，當你係心靈雞湯，每日起身就係睇你，一日就充滿能量，你就覺得自己做緊嘅事有意義。」
這兩年香港發生很多事，很多人或情緒受到困擾，她認為安慰自己很重要，「要保持憤怒，但唔可以嬲到影響咗自己生活；但又唔係淨係去吃喝玩樂，要識得分是非對錯，鬥長命唔可以日日都波濤洶湧，情緒唔可以咁。」雖然香港失去了很多，但香港還有很多人情，「每次冚完阿布泰又排隊，呢啲都係好令人安慰嘅事」。
她去年4月開設專頁，其間發生不少沉重的事，「有時連我都頂唔順，我都會諗要點樣安慰人」。47人案提堂時，她覺得「真係好傷」，「我又諗我應該點樣安慰人。咁不如寫我人生最傷嘅事啦」，於是她將與前男友「荷蘭仔」分手的事，連續寫了四日。「我就發現，我要安慰人，首先我要安慰咗自己先，所以我係比其他人更平靜；人哋以為我用個page嚟治癒人哋，其實我係用佢嚟治療自己。」
很多讀者留言感謝她的安慰，Ling認為與其只是坐著等人安慰，不如自己先做些事情安慰別人，「你自己搵啲嘢做囉！原因唔係好多人要搵你幫，而係首先你要幫咗自己先！」
Ling帶着她在玻利維亞識的荷蘭仔去意大利探望當年教她煮意大利菜的朋友媽媽。（受訪者提供）
每次去意大利都帶一篋食物跟當地朋友打邊爐。（受訪者提供）
雖然是旅遊精，她卻沒成癮，Ling說自己適應能力強，容易調節，「咁冇得去咪冇囉，我覺得呢個情況有少少似旅行backpack（背包旅遊），你永遠唔知聽日發生咩事，你只能夠煮到埋嚟就食」。無法出外旅行，便自行找其他樂趣，打波、圍爐，「心態先係最緊要。因為backpack你不可能plan好多嘢、會好多意外發生，但每一個意外，會令我們更強。」
旅行時她試過遺失銀包、行李、護照，例如她在摩洛哥遺失護照，人生路不熟、語言不通，中國領事館又幫不上忙，「點知又畀我遇到一個曾經係意大利工作的摩洛哥男仔，佢又帶我返屋企食飯，畀我食過一餐最好食嘅地道菜。每次有意外發生，可能不如意，但轉頭可能就會有好事發生。」
每次最深刻的經驗，都是一些不如意的事。「過去三十年大家覺得最大貢獻係幾時？好可能就係2019年。啲義載呀、送物資呀。可能依家已經唔敢再講，或者你覺得好傷嘅事，但係過多幾十年，呢啲就係你曾經最proud of嘅嘢。第日發生好差嘅事，我都會諗，最差嘅我都試過！其他嘢都唔會好差。」
阿Ling坦言，希望透過個page去安慰人。
她不會用「低潮」來形容現時的香港，「我哋個心都死埋先係低潮，我哋個心都冇死！只不過係你依家拎住個強權，我哋形勢比人弱，咪韜光養晦囉。」她舉例以前坐監缺乏支援，「邊有咁多支援㗎大佬，又寫信、又Patreon。就算蘋果真係執咗，就會有網媒㗎啦。全部都係be water之嘛。呢個世界邊有乜嘢旁聽師、寫信師、追車師啫，就係有人開始咗做，又教下人點做，啲人又跟住一齊做。」
她又說：「我微小嘅願望，係透過個page去安慰人。如果每人都做啲微小嘅嘢，咁加埋就會好勁。大媽都覺得自己可以坐喺個法庭度，有幾大件事啫？每人做少少做少少，就係㗎喇。」
Ling認為「be water」是一種生活態度，「我開一個旅行page，但我喺一個冇得旅行嘅時間冒起，人生就係咁㗎啦。」她認為每個香港人都要學這套生活哲學，「甚至有一日，蘋果真係俾人隊冧咗，人都係要生活㗎，我哋咪要學習冇咗蘋果，都要識點樣去分享資訊囉！」她說她是有根據地樂觀，全因她信奉佛教，「佛學講嘅嘢就係世事無常，就算喺逆境都唔會係永恒。」
信佛多年，她深信世事無常，包括香港人的逆境也不會永恆，更深信香港人的努力必會栽種出善果。（受訪者提供）
「你唔肯去接受呢個改變，先令你痛苦。你要令自己釋懷，係你要接受事情係會改變㗎，接受自己控制唔到個改變，用第二個方式去睇件事。」Ling憶述與曾入獄的意大利男生Rizzy談天，當時Rizzy問她：「你去咗咁多地方旅行，你有冇去過監獄旅行吖？我就有呢。」此說話令她印象深刻，「我覺得做人咪就係要咁囉！煮到埋嚟咪食囉！呻都冇用！」
佔中後，很多人也很失落，失落得完全不看新聞，所有補選也輸掉，但之後發生反送中。「戴耀廷話，每次有好大嘅勝利，就好快有嘢會打沉你哋，之後我哋就會喺谷底度。但幾年之後，會起返身，打壓就會起返，起返又會再打壓囉。如果你係谷底已經崩潰咗，點樣等返佢出嚟呀？所以咪要好好生活。」
記者 袁楚楚
-----------------------------