移民買樓裝修冇idea？ 《瀛屋‧型屋》教你平靚正DIY日系裝修風格丨果燃上架

蘋果日報 2020/12/07 00:00

果燃台編輯推介
    從來，香港人對「移民」兩個字就好有感覺，但近年，大家似乎對「裝修」兩個字仲有感覺。一聽到「裝修」，我哋腦海可能會浮現好多畫面，諗起好多嘢……不過坦白講吖，裝修其實唔應該用耳「聽」嘅，而係應該用眼「睇」嘅。
    講到裝修，歐陸風、地中海風、日系風都算係長期流行又包唔老套嘅style，而當中日本文化同香港文化較相近，居室大小亦都相若，因此日系裝飾擺設風格長期都好受香港人歡迎。今期《果燃推介》新上架嘅《瀛屋‧型屋》，正正就係帶大家「睇樓」兼「睇裝修」！你可能話︰「喂，我唔係移民去日本喎！」呢層當然明白啦，移唔移民都唔係重點，重點係「睇裝修」兼睇吓日本人點樣創業做小生意，可能會帶畀你好多靈感，將來移到去心儀地方又好，或者留喺香港都好，起碼都對執靚自己間屋有啲諗頭先吖！
    empty
    三軒茶屋係東京嘅高級地段，安村先生只有能力購買呢間只有320平方呎嘅屋仔。
    《瀛屋‧型屋》呢個星期有5個case，都可算各具特色。第一單位於東京三軒茶屋站嘅主角安村正也先生，佢希望50歲前達成夢想，開設一家以貓作為主題的書店。咦？貓做主題有乜咁特別呀？就係特別在安村先生將屋企嘅貓化身成「店員」，並且為咗令到貓主人可以喺書店裏面隨意走動，安村先生將好多書櫃都打通，而且喺近地面嘅小矮櫃當中放置貓廁所，兼且加入埋「抽氣扇」！呢位貓奴為咗做好「奴才」嘅角色，都可謂別出心裁喇！貓+書+啤酒，身為貓奴兼書蟲嘅你不如同我一齊入去飲返杯。
    empty
    麻雀雖小五臟俱全，安村先生嘅小書店放滿咗貓書同貓精品。
    empty
    安村先生係百分百貓痴，有時痴起上嚟仲會變身做貓，老婆都冇佢符。
    empty

    empty
    因為希望做到上居下舖，大室先生兩夫婦睇中呢幢樓齡30年嘅舊商廈。
    第二單case嚟到大阪天滿區，大室夫婦一家三口買入咗一整幢30年樓齡嘅5層高單幢樓，因為大室太太一直想做到「下舖上居」，所以特別鍾情呢一類全幢購入嘅樓盤。不過話晒都成5層樓咁高，要裝修真係唔易，呢個時候奇蹟出現喇，大室兩公婆直程落手落腳DIY！嘩！一層都整到頭痛，更莫講話5層！原來大室太太嘅工作係室內設計，唔怪得咁有信心「自己嚟」啦！究竟佢哋點樣將一幢小型舊商廈改裝成為工業風設計工作室、band房、家品店兼三口之家。睇咗呢集真係會有唔少啟發！
    empty
    樓高五層的舊商業大廈，全由大室先生兩夫婦親手改裝。
    empty
    大室先生兩公婆係band友，屋企入面有band房，隨時都可以Jam吓歌。
    empty

    empty
    佐別當先生嘅老婆係台灣人，喺戶越銀座買地自己起新居。戶越銀座商店街亦係有名嘅「平民美食聖地」。
    第三單case真係好有特色。主角佐別當先生，娶咗一位台灣女孩譜成異國戀曲，之後，佢心諗與其買樓，不如自己買地自己起樓啦，於是佢喺東京戸越銀座站附近買咗一塊地，自己起咗一幢3層高嘅屋畀自己。喂，買地起屋有幾特別呀？如果買地起屋當然唔夠特別啦，特別就特別在佐別當先生同太太，為人非常熱情好客，佢哋唔鍾意間屋「淨係自己住」，於是起嘅時候刻意將自己屋企打造成「共享家居」，將屋企分租出去同租客開心share！咁都未止呀，佐別當夫婦並唔係為咗賺錢，而係希望同「同屋主」有多啲心靈交流，於是玄關刻意設喺2樓，無論係自己定租客收工返嚟，大家都會撞口撞面傾偈打招呼，聯繫多咗，大家關係亦都非常好。咁先至似共享家居㗎嘛，唔通香港啲劏房咩……
    empty
    佐別當先生同太太，為人非常熱情好客，將屋企分租出去同租客開心share。
    empty
    佐別當先生屋企樓高3層，最底1層係share house，家私電器一應俱全，房間亦相當闊落。
    empty

    empty
    井上兩公婆好鍾意開party，喺東京世田谷區買入呢個昭和年代嘅公寓單位，將屋企改裝成party room同！
    第四個case係個睇到人𢯎晒頭嘅個案，所謂嘅𢯎頭皆因屋主井上夫婦，同樓上嘅佐別當夫婦一樣咁熱情同大愛！原來井上兩公婆好鍾意開party，單單係前一年，全年就開咗100次以上嘅party！計返係每星期開兩次咁多！為咗繼續請朋友嚟屋企「開party」，於是井上夫婦就買咗一個樓齡較舊昭和年代嘅公寓單位，再重新將屋企改裝成party room！講到呢度，大家一定𢯎晒頭嘅係，成日請人返屋企開party，飲飲食食好貴㗎喎，乜井上夫婦豪成咁呀？其實有段故嘅，井上先生煮嘢食手勢一流，好多朋友都鍾意join佢個party，久而久之井上先生索性成立會員制，搞party同時收費！不過講真，雖然呢個party room機關重重，但係最搶鏡嘅可能唔係間屋嘅佈置，反而係井上先生煮嗰一手好菜式！菜式嘅造型都擺設得甚具酒店級水準㗎，難怪連主持人都忍唔住問咗句︰「井上先生你究竟係乜嘢人？」
    empty
    井上先生煮嘢食手勢拍得住酒店大廚，得閒仲會搞吓烹飪班同私房菜，將屋企物盡其用。
    empty
    單單係前一年，全年就開咗100次以上嘅party！
    empty

    empty
    河井夫婦租咗間昭和年代嘅獨立屋，間屋裝修有啲殘舊，又冇理由幫業主翻新間屋，究竟佢哋用咗咩嘢特別嘅裝修技巧，將家居變身成歐陸風嘅型屋。
    呢個禮拜最後一個個案，係東京昭島市嘅河井夫婦，亦可能係香港人最想睇到嘅個案！話說河井夫婦租咗間屋，但又唔鍾意間屋嘅裝修較舊，同時又冇理由揼本幫業主大翻新㗎嘛，咁點搞好呢？於是河井夫婦諗到絕世好橋，就係用一啲黏黏貼貼、拼湊、夾、懸吊等等傳統智慧嘅方法，令到全間屋煥然一新！最神奇係當主持人要求河井先生，將擺滿嘢嘅玄關還原成「交吉」狀態，河井先生竟然只用20分鐘就搞掂晒！呢種黏黏拼拼嘅方法，真係好啱香港人使喎！
    empty
    牆身、地板全部都可以輕鬆咁移走，可以不損牆壁而將室內回復原狀。
    empty
    河井先生親身示範點樣喺20分鐘內，將門口玄關還原， 河井先生話全屋裝修只係用咗20萬日圓，睇過你就知有幾驚人。
    empty

    一口氣介紹咗5間東瀛型屋，又真係個個都千奇百怪各有不同！最正嘅係連解決方法都別出心裁，而且仲畀到好多靈感香港人添！無論你正打算到外地置業，還是啱啱喺香港買咗樓打算裝修同搞啲小生意，今期《果燃推介》嘅《瀛屋‧型屋》都肯定啱晒你！

    果燃台 | 果迷專屬嘅影片世界

    -----------------------------
    《蘋果》英文版免費試睇：了解更多
    英文版已登錄《蘋果》App，立即下載/ 更新：iOS / Android
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！