【新增影片】

阿仙奴星期六作客以4:1大勝史篤城，其中，同槍手一直未能就續約達成協議嘅智利前鋒阿歷斯山齊士，為球隊射成將比數拉開至3:1嘅一球之後，慶祝入波嗰陣喺槍手球迷面前做咗連串手勢，一眾網民即刻金田一上身，個個都變咗做神探解讀「山神」嘅手勢，而佢哋嘅睇法全部都好一致，雖然部分帶有疑問嘅語氣，但個個都覺得「山神」嘅手勢係話畀大家知佢會留低，唔知係網民一廂情願定係「山神」心有靈犀呢？！