韓國人氣劇《鬼怪》男星孔劉自劇集爆紅後，因為一直忙於喺海外拍廣告，所以到大前日先喺韓國蒲頭，為代言嘅服裝品牌宣傳，當日吸引數百粉絲撐場，有粉絲發現孔劉嘅右手戴咗護腕，唔知係唔係扭親。

不過今日男神孔劉又蒲頭，現身代言嘅咖啡品牌宣傳活動，佢喺現場舉行簽名會，仲同粉絲近距離接觸，同佢哋簽名之餘，仲同佢哋握手，有男粉絲仲獲男神摸頭，真係羨慕死人。而孔劉今日同樣穿上長袖衫，未知佢今日有冇戴上護腕。