台灣藝人江明學噚日被發現喺台北新北市嘅屋企吊頸自殺身亡，終年57歲。據台灣傳媒報道，江明學嘅業主原本喺今個月8號打電話催江明學交租，但一直都聯絡唔到佢，直到噚日至覺得有問題要報警，於是就同警察一齊搵上門，破門入屋後發現江明學已上吊，遺體亦已腫脹，估計已死去幾日，現場冇發現遺書。

台灣首個街頭藝人

有翻唱歌王之稱嘅江明學，同張清芳、吳宗憲等同期出道，84年參加第一屆大專創作歌謠大賽入行，89年推出首張專輯《秋意上心頭》大賣25萬張，不過佢之後嘅星途似乎唔多暢旺，事業一直處於低潮，之後仲轉戰節目、電台主持人，04年佢考到街頭藝人執照，成為第一個街頭演出藝人，最高曾經創下一日收入數萬新台幣好成績。

可惜，江明學2005年喺街頭表演時曾受到襲擊，顴骨碎裂導致恐慌症，之後仲因此淡出娛樂圈，直到舊年被發現喺燒肉店打工，同年7月，江明學又發生嚴重車禍，俾車撞倒後連自己個名都答唔到。兩個月後，江明學因涉毒而被捕，當時佢解釋因為壓力太大要吸毒減壓，今年初，江明學喺網上做直播節目主播，希望能夠重新出發，但今個月5號佢又喺facebook透露心情愁悶冇人傾訴，估唔到噚日傳出不幸消息。
撰文：馮仁昭