鄭秀文（Sammi）、韓星崔始源、黃心穎同鄧麗欣（Stephy）今日喺中環出席Chanel腕錶活動，在場已有過百粉絲等始源，而始源亦好識做，完咗訪問就出嚟同fans打招呼。始源做訪問時，就以英文、廣東話同國語打招呼，佢就話嚟緊籌備專輯，同去美國拍電影，問到佢係唔係進軍荷李活？佢笑言當地會有會議，韓國同大陸電影都有傾：「將會有綜藝節目《Super TV2》拍攝，自己好開心，鍾意拍綜藝節目，希望能夠多點演出機會就越好，現在有時間我就學漢語。」並即刻用普通話講：「我發音好不好？」

當年同始源合作《破風》嘅竇驍都喺香港拍廣告，始源話約咗晚宴之後見面，同樣有份演《破風》嘅陳家樂噚日宣佈失戀，始源嘅翻譯就話佢唔知道呢啲新聞，唔會回應，而始源就以普通話表示：「我聽不明。」問到佢會唔會開騷，始源就話2月已開，希望明年再開，而粉絲會未有計劃，不過好希望可以同香港粉絲見面。

另外，Stephy就喺場內同始源合照，佢笑言：「佢（始源）主動話要同我影相，第一次見佢真人好吸引。」記者問到佢始源係唔係佢杯茶，Stephy表示：「靚仔最緊要，聽聞佢想拍香港打戲，我呢排都有練下，希望真係有機會可以合作，如果係，真係唔錯。」

提到之前同吳雨霏飯聚，佢就話唔係baby shower，只係同佢食生日飯：「佢同我哋講，醫生話佢隨時生得，之前兩、三個禮拜見過一次，個肚都冇咁大，忽然大咗咁多，個餐飯好緊張，因為諗如果佢突然生得點好？」問到佢本身恨唔恨生B，Stephy笑言：「以前有啲幻想，到時生會點，今次Kary自然生，我自己有諗到時係自然生定開刀生呢啲細節。」最後，問到佢會唔會收對方BB做契女，佢話：「冇傾過，我哋冇乜所謂，都會好錫BB。」