韓國「國民妹妹」IU今日襲港，準備聽日嘅亞博騷，而佢今日率先到銅鑼灣舉行記者會提早見港迷，吸引大批粉絲到場支持。但未知係咪因交通關係，IU遲咗半小時先到達現場。

晚上7點35分，身穿紅色短裙晒腿嘅IU喺粉絲嘅尖叫聲下現身，隨即用廣東話表示：「大家好，我係IU，有冇掛住我？真係好掛住你哋，遲咗嚟，對唔住。」相當有心。

之後被問到再訪港演出嘅感受，IU表示喺機場已感受到粉絲嘅熱情，覺得好開心。對於聽晚港騷有冇特別準備？IU就賣關子表示：「因為今次係出道十周年嘅演唱會，所以包含咗好多內容，可能喺第二環節？」隨後IU僅透露會有特別嘉賓，但就冇講係邊個。提到新歌《BBIBBI》，IU表示係送畀粉絲嘅禮物。

IU將於聖誕節移師到台灣開騷，IU表示：「以前會覺得聖誕節喺工作中度過係好可惜嘅事，但0依家就覺得好幸福。」

於稍後嘅訪問環節中，IU提到喺節目《孝利的民宿》而結緣嘅一班民宿客人，表示：「有邀請佢哋嚟睇演唱會，雖然咁耐先見，但大家都冇隔膜，見得好開心，佢哋仲準備咗禮物畀我。」被問到上月舉行嘅《2018AAA》頒獎禮中贏咗4個獎，IU都大感高興，最鍾意嘅獎項就係粉絲投票先得到嘅人氣獎。

精選韓流，喺晒《娛果》
http://fb.com/appledailyent