胡諾言、陳琪、胡楓（修哥）及可嵐等，今日去到沙田為一所兒童中醫診所主持開幕儀式。胡諾言指，日前演出舞台劇，獲大女到場支持，心感高興，陳琪笑指：「首場原先個女話去睇，點知冇去到，搞到爹哋（胡諾言）都有啲失望，估唔到佢咁期待阿女去睇。」

胡諾言指小朋友雖然要應付考試，但唔希望佢哋為讀書而讀書，亦有選擇權去玩自己喜歡嘅活動。因為參與《全美一叮》成為全城焦點嘅Celine（譚芷昀），其父譚順生亦「因女成名」被起底，並惹來批評，胡諾言強調與對方不熟，但讚Celine好叻，胡諾言話：「能夠代表香港人去唱歌，自己父母心態當然希望仔女叻，但人哋嘅事唔評論。」陳琪話：「Celine爸爸都有問Jay（大女）想唔想跟佢學唱歌，Jay話自己每星期已經要上學校合唱團，而且我又唔覺得我個女有天份，所以俾佢自己選擇。」

另外，可嵐於4月練習跳彈牀時，不慎弄斷左腳十字韌帶及半月板碎裂，今日撐住拐杖到場，可嵐話：「醫生叫盡量休息，但9月要開戲，自己都怕康復唔切，之前趕飛機返大陸做騷，都搞到半月板再傷。」

同場嘅修哥就話不時都保持運動，每日步行兩小時，問佢有冇約老友四哥謝賢一齊行，修哥笑言：「佢有佢行，我有我行，大家唔同路。知道佢話搬新屋，好快俾番個仔，真係口不擇言，好戥佢高興有豪宅住。」