由NHK晨早劇《阿淺來了》女主角波瑠改戲路接拍嘅TBS台新劇《其實並不在乎你》，因大膽嘅不倫戀橋段，令開播後喺當地引起網民討論，收視亦越來越好，劇集於日本網上串流平台累積共100萬次重溫紀錄，係繼《逃跑雖可恥但有用》之後再有日劇創下呢個佳績，而噚晚播出加長15分鐘嘅最後一集，平均收視高達14.8%，創下開播以來最佳成績。

波瑠今次挑戰演一個背住老公偷食舊情人嘅人妻，飾其痴情丈夫嘅東出昌大演技獲觀眾讚賞，二人大結局都係要各行各路，至於上位型男鈴木伸之扮演女主角嘅偷食對象，呢集佢再有同劇中老婆仲里依紗嘅咀戲，不過鈴木伸之就要慘被仲里依紗掌摑，睇到女fans大嗌心痛。