林雅詩(Grace)6月初喺大馬做做吓fb直播突然被人搶手袋，跟住又直擊經理人馬天樂等人閃電捕獲疑犯，本來以為一宗普通打劫案，但係事後Grace又聲稱係一場誤會，又話對事件中受影響人士作出道歉，結果成件事越搞越大，有網民質疑佢係自編自導自演，甚至有指大馬警方建議將林雅詩列入不受歡迎人物，禁止以後入境大馬。(新聞連結： http://bit.ly/2sfP6NF )

事發後，Grace梗係急返香港，不過佢返到香港喺機場離開嗰陣，突然又休克，要女同事抱佢上車再送佢返屋企，一直未有現身為事件解畫。潛咗水差唔多3個禮拜嘅Grace，終於現身接受周刊嘅訪問，佢話之所以到今日先出嚟講，因為成件事都涉及咗好多嘢，一來佢唔知邊啲可以講，邊啲唔可以講，二來佢亦控制唔到自己嘅情緒，Grace亦話佢唔需要用呢個方法呃like，只要喺fb擺張性感相，已經可以好多人睇。

講到Grace聲稱事件係一場誤會，佢坦白話牽涉好多政治因素，嗰晚發生咗呢件事之後，乜嘢都叫佢封口唔講得，雖然佢係受害者，但係有好多嘢唔講得，佢亦唔夠膽去講，O依家心情仲未平伏，不過可以安全返到香港，已經係好好嘅事，Grace亦否認自己被列入不受歡迎人物，亦冇見過警察。