當年今日
關於我們

轆Book:變變變生命力 蟲新出發

蘋果日報 2007/05/15 00:00


車仔嚟講,Mini都算經典中嘅經典,全球Fans無數,長玩長有;但另一邊同樣玩細細架、得得意意嘅福士甲蟲車,擁躉數目及熱情一樣唔輸蝕!且聽玩咗甲蟲多年嘅阿紀及Dick一番肺腑之言:「甲蟲唔同Mini,又窄又無冷氣,女仔聽見已掉頭走,媾唔到女仲要成日花錢花時間去整!」咁辛苦為乜?一切只為回憶!

記者:梁佩芬
攝影:陳陶鈞
鍾意整多過儲
香港有好多個甲蟲車會,而阿紀屬「蟲在香港」會長:「會長其實無乜好做,似中央聯絡人多啲,外間有乜活動都會先搵我,大家都方便啲。」以為創會者有幾十架珍藏甲蟲,原來只得架71年款嘅VW1300橙色甲蟲,「買架老爺甲蟲返嚟唔貴,二萬蚊已有交易,執番靚全程唔使四萬。加上甲蟲細細架,每個月五千蚊租嘅倉已放到十幾架,皮費不大。問題是,我鍾意幫人執靚架車多過儲車,所以冇乜珍藏。」
empty
■這架VW1300是阿紀第二架甲蟲,三萬收番嚟,整多成萬銀!
empty
■這兩年回歸遊行,阿紀也派出甲蟲車隊助陣!
被呃!下決心自學整車
堂堂一個文職公務員,離開冷氣辦公室匿入元朗,又曬又熱又污糟地幹起來。如此辛苦,全因一次受騙經歷!中學畢業後,阿紀開始收集甲蟲精品,原只為貪得意,對型號性能一概不知。後來買了人生首部甲蟲,可惜意外炒了,就找些所謂甲蟲迷修理,點知前前後後竟然整咗大半年、花了五萬,最後一句:「無零件,整唔到。」攞到明上當!
empty
■阿紀當年被騙,遂下定決心學整車,自娛又幫到人。
自此,阿紀的起心肝決定自學修理甲蟲,希望透過不同渠道認識真正的「甲蟲迷」,交流整車心得。直到99年,「蟲在香港」成立,而阿紀好多時都義務幫會員整車,只收零件費,可算熱誠十足。但事先聲明,他只是兼職整車,唔好諗住短時間攞得番架車!
empty
■香港甲蟲會「蟲在香港」會長阿紀,最想投到呢個「BUGINHK」車牌,配合番個網址(www.buginhk.com)。
甲蟲一樣有凝聚力
成立車會的確認識不少車友,連外國甲蟲迷都有聯絡;02年,他們一行七人到了吉隆坡一會當地甲蟲迷:「400幾架甲蟲聚埋一齊,夠晒壯觀,真係開心到爆!」
有空就整車,會否忽略女友?「我女友本來對甲蟲無興趣,但兩年前看過《鬼馬甲蟲車》後就愛上,可惜她只有自動波牌;最後左搵右搵部自動波甲蟲返嚟畀佢揸,3萬幾有交易,只是殘了些,經我執過後就靚仔番晒啦!」
empty
■估不到阿紀連紙巾盒都襯番自己架橙色甲蟲車,夠絕!
阿紀開倉晒冷
兩車出世雖只差一年,但卻有幾點大改變,如67年是平玻璃及圓頭燈,而68年則是圓玻璃加平頭燈。
empty
兩年前在街上起火燒毀,阿紀用一年時間維修,家陣行得走得,仲噴上火焰圖案,都唔知攞景定贈興!
empty
呢架1952年出世嘅左軚甲蟲,屬全場最老一架,專程從美國運來,是甲蟲會「鎮蟲」之寶。
empty
阿紀女友的甲蟲,是難得的自動波車,由一名住大埔的鬼佬轉讓,2萬有交易,車牌AW6800又靚,一見即合。
empty
停不了的精品
要數精品珍藏,甲蟲迷毫不輸蝕畀Mini迷,就睇吓呢堆玩意,品種及數量都係咁驚人!
empty
■會長阿紀並非盲目追求,會不斷鑽研雜誌,對甲蟲可算有深厚認識,整起車嚟零舍得心應手。
empty
■以前,阿紀夢想自己的車房,只能在模型裏實現;現在,總算美夢成真。
empty
■阿紀儲埋多年嘅甲蟲Tee有成300件,平均一年才翻着一次!
甲蟲是集體回憶
另一位標準甲蟲迷Dick,儲甲蟲只是為回憶,他不愛改裝甲蟲,下雨亦不出車,高危地方如街邊錶位、露天停車場就死都唔泊!如此深愛甲蟲,以為會陪伴終老,但Dick抵死加句:「如果你畀40萬我,六部甲蟲即刻賣畀你!」
現在,他最愛就是被阿紀維修了兩年也未能行多過200米嘅70年款VW1300開篷甲蟲,將本身是綠色噴成似消防車嘅紅色。Dick相信再過一年,便可在街上招搖過市!
我也感受到此等深情,因為我就曾經喺南美嘅秘魯度,看過整條街都泊滿甲蟲,紅橙黃綠青藍白黑灰都有,嗰刻令我對甲蟲印象相當深刻。阿紀、Dick及各甲蟲迷,有機會一定要看看!
empty
■Dick的另一架甲蟲,性能不錯,但咪錶成日壞。
empty
■好多甲蟲都撻唔着車,要麻煩會長用手推出嚟拍照。
empty
■側邊的小窗,可算是舊款甲蟲嘅招牌。
以前阿爸都係揸甲蟲,但只知架車好高,幾得意!但我一開始都不是玩甲蟲,玩MINI同Benz都有!到五年前,突然懷念甲蟲車,不知不覺又儲了6架!
你睇阿紀,上年成日揸架VW1300,好傷啫!但係今年又不想揸,有時又撻唔着,咪就係少咗同架車傾偈囉!
empty
■Dick以5萬5買入呢架甲蟲,以一部罕有的1970年開篷甲蟲嚟講實在係抵!
緣來希魔
上世紀30年代,希特勒下令保時捷的設計大師FerdinandPorsche,在福士車廠生產甲蟲車。至1978年1月,西德宣布只剩下墨西哥及巴西繼續生產甲蟲,最後捱到2000年才全面停產,產量近2,046萬架,可算同一車系中賣得最多!