才一年光景，721鹿變馬，原告淪被告，白衫當黑衣，而時鐘就在一年後忽然識得行快咗柒倍，39分鐘變成18分鐘。就當成十公里跑的紀錄吧，都改得肉酸、牽強、搵笨實！差佬的時鐘唔係酒店嗰隻，相差那21分鐘，應節，就是陰間地府的未來預支，欠了閻王的時辰，幾時報，點樣還，已經寫好在更簿上，只係有人明知厲鬼纏身都話，耳邊有風啫。

831事實，將會依隨721，遭粗暴斬件。教科書送審，這兩日發生的事，一係全部跟足官腔，一係全部刪走。元朗站太子站應猶在，只是豬欄改（係呀，拍吓隻豬膊頭是叫牠離開咁解）。太子站比元朗站詭異，因靠近警局，進出人士都是關帝followers，過去很多個月，站外香火繚繞，入夜後，合十敬拜的市民，喃喃私語，像極了城市中一台靈堂。但我們知道，太子站不會被允許破地獄，跟尚德邨停車場看齊，封場大維修後每一根柱都不留下一點墮下的血痕。站內CCTV假如沒有盲，會拍到消失的魑魅魍魎object。往鬼門關的列車即將到達，請勿靠近月台。