前歐洲不敗馬王「范高爾」投身配種多時，上年開始已有啲後代喺外地贏大賽，到今季則有四駒以自購馬身份到港，分別為未命名的B089、B150、B203及羅富全麾下「精明才子」。

今晚（22日）有「精明才子」率先於第七場三班1200米亮相，其馬主駿才賽馬團體第一次養馬，實際睇個「才」字，已經唔難估到同「才」系主要馬主梁麟炳有關。

梁麟炳將名下新馬「全才」交俾羅富全訓練，佢公子梁冠華就係「精明才子」馬主團團經理人。「精明才子」除交由羅理雅試閘操好外，羅富全亦不時戎裝親操，梁麟炳全家都咁支持，羅富全梗係想盡快贏馬答謝。