TVB嘅《東張西望》一向都俾網民話不倫不類,經常扮中立,但又娛樂溝時事,想探討新聞,但又做唔到深入報道,更甚係有時棄雞蛋一邊,專幫高牆權貴護短,報道碼頭工潮時大家都領教過。
有網民又發現今個星期一嘅《東張西望》又講時事,今次就講下近年多咗好多非政府組織免費派飯或提供廉價飯餐俾露宿者或低下階層,本來訪問頭十分鐘都好好哋,文稿都係話「幫襯廉價飯都係為勢所迫」,不過到最後,又再係「東張西望式」各打50大板,最離譜係兩位主持就輪流咁話:
「有評論就話,呢啲老闆可能係好心做壞事,事關有調查顯示,係深水埗區既露宿人數係有上升既趨勢,可能因為係有免費飯餐。」
「我哋唔否認啦,可能就有人濫用呢啲福利而唔努力,如果為左呢一小撮人,就cut左免費派飯既話,真正有需要既人士就受惠唔到。」
「無錯啦,自食其力永遠係最重要架......」
「派飯令露宿者增加」呢個論點,今年9月有社署中人咁樣講完深水埗派飯嘅明哥,已經遭各界狂轟,當時有網民話:「簡直係將事實本末倒置,就係因為社會的福利制度唔完善,所以先至有團體去幫助有需要的人,現在卻反過來話咁樣助長露宿者露宿?一派胡言!」
咁荒謬嘅論據都可照樣引用,一個人真係為咗貪兩餐飯去做露宿者?網民都寸爆話:「請CY都唔返工囉,去深水埗瞓街囉。大家一定會俾盒飯佢。」究竟係邊個縱容物價上漲,炒風熾烈令市民苦不堪言先要淪落到瞓街呢?一定係因為多咗人派飯啦!
下星期二,《東張西望》就會播出「電視牌照風雲」特輯,不過星期三就係立法會議決會否引用權力及特權法要求政府公開發牌資料嘅日子,呢日播嘅用意係咩?網民都心中有數....