郭富城老婆方媛（Moka），早前《蘋果》獨家爆料Moka再度懷孕，城城仲係之前囡囡Chantelle嘅一歲生日派對上，同好友分享話「雙喜臨門」（新聞連結︰ https://bit.ly/2NcSaom）。本月初，Moka出席友人生日派對時，穿鬆身裙嘅佢腹部微隆，但手腳同面形都仍然纖瘦。（新聞連結︰https://bit.ly/2Mxhi3U）

佢上月5日，Moka喺自己嘅微博留言祝自己︰「Happy birthday to me」之後，成個半月都冇update過微博，噚晚Moka貼咗張上半身側面相，完全睇唔到佢腹部，唔知係咪唔想畀人見到懷孕肚呢？而相中嘅Moka薄施脂粉，上半身只見佢着住黑色露手臂嘅衫，唔知係連身裙定上衣，仲戴住條長長珠鏈，打扮較成熟，佢身處一間露天餐廳，方媛留言寫住︰「好久不見，聽說有人在等我更新哦！」佢嘅粉絲馬上留言回應︰「更新了。」，而Moka再回覆粉絲話︰「微博冷冷清清好久了。」

至於邊個幫手揸機影相，有網民留言問︰「對面的是孩子他爸吧！」不過睇番Moka仲用緊iPhone 7 plus嚟update微博貼相，唔追款認真慳家，最近又出咗新款電話，唔知城城會唔會買機打孖上，預埋老婆呢？至於Moka嘅生日，佢自己嘅微博就寫住1988年8月5日。但翻查資料，舊年3月城城同佢喺香港入紙註冊結婚，被傳媒發現嗰張擬結婚通知書入面，Moka嘅出生日期寫住1987年7月6日，當時報導入面，仲話佢喺微博寫住出生日期係1988年6月11日，疑報細一年之嫌！依家睇番究竟佢係6月、7月定8月生日呢？（新聞連結︰ https://bit.ly/2p6WS8u）

精選娛聞，喺晒《娛果》
http://fb.com/appledailyent