養緊傷嘅保羅普巴仲要唞幾耐？魔迷唔使慌，皆因佢最新post喺IG嘅一段短片，見佢跳舞跳得好開心，雖然隻右腳仲有少少趷下趷下，但應該唔使太耐就可以復出。

普巴喺對巴素利場歐聯分組賽拉傷腿筋，之前傳話可能要唞成三個月，而摩連奴雖然之前出席記者會時，冇透露愛將幾時復出，但亦都話要幾個禮拜。

不過，普巴最近上載咗一段短片，段片係隊友杜安薛比拍低嘅，片中嘅佢淨係著住條黑色短褲同頸上戴住條黑色頸巾，然後赤住膊聞歌起舞，睇落隻腳已經冇乜太大問題，佢喺caption度就咁寫：「就算受傷，呢度都一樣咁開心..多謝杜安薛比嘅笑聲。」睇嚟普巴可能喺10月國際賽周前，就已經可以復出，下個月月中場「雙紅會」料可候命。

另外，英媒話車路士就慘咯，因為中堅大衛雷斯喺對阿仙奴場波，懷疑上半場末段有次追波時收唔切掣，撞咗落場邊塊廣告版，隻手腕可能扭親，要休戰一段時間，但就唔需要做手術。不過，佢喺呢場大戰因為凶狠攔截哥拉辛拿斯，被紅牌驅逐，點都要先停三場再講。

↓普巴跳舞片↓
http://bit.ly/2xn0GHO