【新增新巴回應】
上個禮拜，我哋先報道過九巴兩宗「奇聞」（ https://bit.ly/2Jn1WCe ），今個禮拜，輪到新巴。話說有網民喺「巴士的事討論區」facebook群組貼相，睇到架新巴車尾流出大量好似鮮血咁嘅紅色液體，驟眼睇仲以為係架巴士撞傷途人，有人仲問係咪車底藏屍，都咪話唔恐怖！不過唔少網民好快留言解畫，話只係架巴士機件「漏油」，可謂虛驚一場。

樓主話，啲相係車長WhatsApp群組度拎出嚟，仲講笑話架巴士「月經到」、「《奇洛李維斯回信》（因車身貼上薜凱琪廣告）之姨媽到」，吸引唔少網民留言，競猜架巴士究竟流咗啲咩油出嚟，搞到成地都係紅色。

我哋問過汽車工程專家、香港汽車工業學會會長李耀培，佢話巴士嘅柴油（油渣）雖然都係紅色，但唔會好似幅相嗰隻咁深色，而且今次仲漏咗咁多，估計漏出嚟嘅，有機會係風油軚油，或者波箱油。佢仲話，呢啲車用壓力油，會以唔同顏色嚟區分可承受嘅壓力，而其他車用油亦有唔同顏色，例如潤滑機油就係黃色。

李耀培又話，如果架巴士半路中途洩漏風油軚油，或者波箱油，堂軚會好重擰唔到，又或者轉唔到波，車長都要即刻停車檢查。

新巴發言人就話，單憑呢兩張相，難以追查件事嘅詳情係點，但強調公司一向着重行車安全，如果架巴士行車途中有問題，會盡快安排它回廠檢驗。

記者 李鈺廷

網民點睇

Andy Lau：咁睇都幾恐怖
Andy Lam：唔係撞到人呀嘛？
李頴琦：藏屍案？
Sad Sam：莫非……架巴士月經到？一定係，除非唔係……
柏汶：架巴士破處了
Chi Hang Luk：漏波箱油定軚油？
Kwan Chuen Cheung：漏冷卻風扇泵油？